लकडाउनको अवधि बढाउने सरकारको तयारी

न्यूज ब्यूरो, काठमाडौं । सरकारले विश्व महामारीको रुपमा फैलिरहेको कोरोना भाइरस (कोभिड १९) रोकथामका लागि लागू गरेको लकडाउनको अवधि बढाउने तयारी थालेको छ ।

कोरोनाको फैलिन नदिन एक साताका लागि लगाइएको लकडाउनको अवधि बढाउने गरी सरकारले आवश्यक तयारी थालेको हो । शंकास्पद व्यक्तिहरुको जाँच रिपोर्ट नआएसम्म लकडाउन यथावत् राख्ने तयारी सरकारको छ ।

हवाई र स्थलमार्ग हुँदै नेपाल छिरेका मानिसको अन्तिम स्वास्थ्य जाँच रिपोर्ट नआएसम्म लकडाउन यथावत् राख्ने गरी तयारी थाल्न गृह मन्त्रालयले ७७ वटै जिल्लाका प्रमुख जिल्ला अधिकारीहरुलाई निर्देशन दिएको छ ।

चैत ११ गतेदेखि १८ गते बिहानसम्म एकसाताका लागि सरकारले लकडाउन घोषणा गरेको थियो ।