युवाहरुको अनुकरणीय काम : मास्क बाँड्दै, जनचेतना फैलाउँदै

न्यूज ब्यूरो, सिरहा । विश्वभर महामारीको रुपमा फैलिँदै गएको कोरोना भाइरस (कोभिड १९) बाट बच्न यत्तिबेला मुखमा मास्क नलगाएका कोही भेटिदैनन् ।

एकातर्फ, अत्यधिक खपतले अहिले बजारमा मास्कको चरम अभाव देखिएको छ भने २० रुपैयाँसम्ममा पाउने मास्क चर्को मूल्यमा विक्री वितरण भइरहेको छ । अर्कोतर्फ, गाउँघरमा जनचेतनाको अभाव तथा आर्थिक विपन्नताले केही सर्वसाधारणहरु मास्क प्रयोग गरेका देखिँदैनन् ।

जनचेतनाको अभावमा स्वास्थ्यप्रति समेत त्यति सजगता अपनाएको देखिँदैन । कोरोना रोकथामका लागि सरकारले देश लकडाउन गरेपछि झन मास्कको चरम अभाव भएको अवस्थामा सिरहामा युवाहरुको एक समूहले मास्क वितरणसँगै जनचेतना अभियान चलाएका छन् ।

सो टिमले बुधबार सिरहाको मिर्चैया नगरपालिका १२ सिक्रौनमा झण्डै एकहजार मास्क वितरण गरेका छन् । उनीहरुले व्यक्तिगत खर्चमा मास्क बनाएर विपन्न परिवारलाई छनोट गरी मास्क बाँडेका छन् ।

जनमत पार्टीको भातृ संगठन विद्यार्थी जनमत संघ सिरहाका अध्यक्षसमेत रहेका अरविन्द सहनीसहित स्थानीय युवा अरुन सहनी, दिलिप कामती, प्रकाश सहनी र धिरज कामती लगायतले मास्क वितरण तथा जनचेतना अभियान चलाएका हुन् ।

टिमले मास्क वितरणसँगै देशमा कोभिड १९ फैलिन नदिन गरिएको लकडाउनको पालना गर्न सर्वसाधारणहरुलाई सचेत गराउने काम गरिरहेका छन् । चिकित्सकसमेत सम्मिलित सो टिमले सर्वसाधारणलाई स्वास्थ्यप्रति सजगता अपनाउन तथा आवश्यक परामर्श तथा सल्लाह दिँदै सचेत गराइरहेका छन् ।