जनकपुरबाट लकडाउन उल्लंघन गर्ने ३७० गाडी पक्राउ

न्यूज ब्यूरो, जनकपुरधाम । सरकारले आज (मँगलबार) विहान ६ बजेदेखि लगाएको लकडाउन (एक प्रकारको कर्फयू) उल्लंघन गर्ने ३ सय ७० सवारी नियान्त्रणमा लिइएको छ ।

विहानैदेखि बेलुकासम्मको तथ्याँक अनुसार जनकपुर सहित जिल्लाको विभिन्न ठाउँमा ३ सय ७० सवारी साधनहरु नियन्त्रणमा लिइएको हो । सो सँगै ८ जनालाई समेत नियन्त्रणमा राखिएको छ ।

विना अनुमति, जिल्ला प्रशासनको पास, ईमरजेन्सीको सवारी चलाएको भन्दै उनीहरुलाई नियन्त्रणमा लिइएको जिल्ला प्रहरी कार्यालय धनुषाले जनाएको छ ।

जनकपुरको भानुचोकबाट सबभन्दा बढी मोटरसाईकल नियन्त्रणमा लिइएको प्रहरीले जनाएको छ । अन्य ठाउँबाट पनि बस, जीप, पिकअप, मोटरसाईकल, ई–रिक्साहरु समेत नियन्त्रणमा लिएको हो ।

कोरोना भाइरसको महामारीबाट जोगाउनको लागि नेपाल सरकारले देशलाई एक साताको लागि लकडाउन गरेपनि जनकपुरमा भने त्यसको व्यापक उलंघन गरेको देखियो ।

प्रथम दिन भएकोले सूचना प्रवाहको कमिका कारण पनि लकडाउनलाई वेवास्ता गरी सडकमा निस्कीँदा पक्राउ गरिएको जनाइएको छ । जथाभावी मोटरसाईक कुदाउनेहरुलाई बढी पक्राउ गरिएको जनाइएको छ ।

धनुषा प्रहरीको व्यापक फोर्स परिचालनको बाबजुद पनि प्रथम दिन (आज) लकडाउन भने फितलो देखियो । कोरोनाको सँक्रमणबाट बच्न सुरक्षाकर्मीहरुले दिनभरि सडकमा उभिएर जनतालाई सुरक्षा दिएको छ ।

लकडाउन आम नागरिककै सुरक्षाको लागि हो भनेर जनचेतनाको अभावमा लकडाउनको नियम उल्लंघन गरिएको देखिएको हो ।