लकडाउन विहानैदेखि देशैभर सुरु, उल्लंघन गरे कारवाही

न्यूज ब्यूरो, काठमाडौं । सरकारले जारी गरेको ‘लकडाउन’को सूचना आज बिहान ६ बजेदेखि देशैभर लागू भएको छ ।

यससँगै अब देशभरका नेपालीहरुलाई आजदेखि चैत १८ गतेसम्म बिहान ६ बजेदेखि साँझ ६ बजेसम्म घरबाट बाहिर निस्कन रोक लगाइएको छ । सोमबार साँझ बसेको कोभिड १९ नियन्त्रण उच्चस्तरीय समन्वय समितिले कोरोना नियन्त्रणका लागि नेपालभर ११ गतेदेखि १८ गतेसम्म कुनै व्यक्ति घरबाट बाहिर ननिस्किने आदेश जारी गरेको हो ।

समितिले आन्तरिक उडानमासमेत रोक लगाउनले निर्णय गरेको छ । यसैगरी, देशभर सार्वजनिक यातायात बन्द गर्ने निर्णय गरेको छ । अत्यावश्यकबाहेक सरकारी कर्मचारीलाई बिदासमेत दिने निर्णयसमेत आइतबारको मन्त्रिपरिषद् बैठकले गरेको छ ।

सोमबार मात्र काठमाडौंमा एक जनामा कोरोना भाइरसको संक्रमण पुष्टि भएको थियो । लकडाउन अवधिभर अस्पताल, सुरक्षाकर्मी तथा अत्यावश्यकबाहेक कुनै पनि सवारी साधन सञ्चालन हुनेछैन ।

नेपाल सरकारले कोरोना भाइरस संक्रमणको महामारी रोक्न गरेको ‘लकडाउन’ उल्लंघन गरे कारवाही हुनेछ । लकडाउन उल्लंघन गरेमा ६ महिनासम्म कैद र ६ सय रुपैयाँसम्म जरिवाना वा दुवै सजाय हुनेछ ।