डब्ल्यूएचओको चेतानवी : 'युवाले होसियारी अपनाऔं'

न्यूज ब्यूरो, एजेन्सी । कोरोना भाइरसको संक्रमणबाट रोग प्रतिरोधात्मक क्षमता कमजोर भएका, प्रौढ तथा वृद्ध मात्र नभएर युवा पनि जोखिममा रहेको भन्दै होस र्पुयाउन विश्व स्वास्थ्य संगठन (डब्ल्यूएचओ) ले चेतावनी दिएको छ ।

अहिलेसम्म यसको अधिक चपेटमा वृद्ध उमेकार व्यक्ति परिरहेका भए पनि युवा पनि यसको खतराबाट मुक्त नरहेको भन्दै होसियारी अपनाउन डब्ल्यूएचओले सुझाव दिएको हो । कोभिड १९ का कारण अहिलेसम्म विश्वभर ११ हजारभन्दा बढी मानिसको मृत्यु भइसकेको छ र अढाई लाखभन्दा बढी संक्रमित भइसकेका छन् ।

अहिलेसम्मका रिपोर्टले वृद्ध उमेरका व्यक्तिलाई मात्रै कोरोना संक्रमणको उच्च जोखिम रहेको देखाएकाले युवाले लापरबाही गर्न थालेपछि विश्व स्वास्थ्य संगठनले यस्तो चेतावनी दिएको हो ।

चीनमा कोरोनाका कारण ज्यान गुमाउने १ प्रतिशतभन्दा थोरै मानिस ५० वर्षमुनिका पनि रहेको न्यूयोर्क टाइम्सले जनाएको छ । तर, १५ प्रतिशतभन्दा धेरै ८० वर्ष उमेर कटेका रहेको पाइएको छ । कोरोनाको त्रासले यत्तिबेला विश्व नै आतंकित बनेको छ ।