प्रदेश २ को नाम र राजधानीको लागि आज मतदान

न्यूज ब्यूरो, जनकपुरधाम । प्रदेश २ को स्थायी राजधानी र नामाकरणको लागि आज मतदान हुन लागेको छ ।

राजधानीको बिषयमा सबै दलबीच सहमति जुटेपनि नाममा सत्तारुढ र प्रतिपक्षी दलबीच कुरा नमिल्दा मतदानबाट टुंगो लगाउन लागिएको हो । मतदानको लागि आज ८ बजे प्रदेशसभा बैठक बोलाइएको छ ।

तीन महिनापछि गत शुक्रबार बसेको प्रदेशसभा बैठकमा प्रदेशको नाम र राजधानी तोक्न गोप्य मतदानका लागि प्रस्तुत गरिएको प्रतिवेदनमाथि छलफल गर्दै चैत ४ गते बिहान ८ बजे मतदान गर्ने सर्वसम्मतिले निर्णय गरिएको थियो ।

नामाकरणका लागि सत्तारुढ दलले मधेश प्रदेश, कांग्रेसले मिथिला प्रदेश नेकपाले जानकी प्रदेश र विरगञ्जतिरका कांग्रेस र समाजवादीका केही सांसदले मध्यमधेश नाम राख्नुपर्ने प्रस्ताव गरेका छन् ।

प्रदेशको राजधानी जनकपुरधाम नै पक्कापकी भएपनि नाम भने मतदानपछि नै टुंगो लाग्नेछ ।