कोरोना आशंका गरिएका सिरहाका ११ जनामा ज्वरो मात्र !

न्यूज ब्यूरो, सिरहा । विश्वलाई नै आतंकित बनाएको कोरोना भाइरसको संक्रमण आशंका गरिएका सिरहाका ११ जनामा ज्वरो मात्र भएको पाइएको छ ।

सिरहाको सिरहा नगरपालिका–१० नरहैयाका ११ जना बिरामीमा कोरोना संक्रमणको आशंका गरिएपछि थप परीक्षणका लागि प्रादेशिक अस्पताल जनकपुर पठाइएको थियो । केही दिनअघि भारतबाट फर्केका उनीहरुमा रुघा खोकी र लगातार ज्वरो देखिएपछि कोरोना संक्रमणको आशंकामा थप उपचारको लागि जनकपुर पठाइएको थियो ।

तर, उनीहरुको स्वास्थ्य जाँच गर्दा सामान्य ज्वरो मात्र रहेको पाइएको सिरहाका प्रमुख जिल्ला अधिकारी गोपालप्रसाद अधिकारीले जानकारी दिए । उनीहरुमा लागातार ज्वरो र रुघाखोकी देखिएपछि गाउँमा कोरोनाको आशंका गरिएको थियो ।

कोरोना आशंकाको हल्लाले त्यसक्षेत्रका बासिन्दा त्रसित बनेका थिए । कोरोनाको हल्लाले त्रास उपन्न भएपछि त्यहाँका वडाध्यक्षको सहयोगमा उनीहरुलाई स्वास्थ्य परीक्षणका लागि जनकपुर पठाइएको थियो ।