खुल्ला दारुबाट मृतक परिवारलाई मधेश सरकारले ३/३ लाख दिने घोषणा

न्यूज ब्यूरो, जनकपुरधाम । खुल्ला दारु (रक्सी) सेवनबाट मृत्यू भएका धनुषाका मृतक परिवारलाई ३/३ लाख रुपैयाँ क्षतिपूर्ति दिने घोषणा गरिएको छ ।

प्रदेश नं. २ का मुख्यमन्त्री मो. लालबाबू राउतले सोमबार (आज) विहानै धनुषाको रमदैया मृतक परिवारहरुसँग भेटघाट गर्दै मृतक प्रत्येक परिवारलाई प्रदेश सरकारको तर्फबाट ३-३ लाख रुपैयाँ क्षतिपूर्ति दिने बताउनुभएको छ ।

आज विहान ८ बजे धनुषाको क्षीरेश्वरनाथ नगरपालिका वडा नं. १ र २ रमदैयामा पुगेर पीडित परिवारलाई सो रकमको घोषणा गर्नुभएको हो ।

“यो रकम ठुलो रकम होइनन् , ज्यानको कुनै किमत छैन, तर सान्तावना स्वरुप, राहत स्वरुप मात्र हो । ज्यानमारालाई ज्यानको मुद्दा लगाएर सख्त कारवाही गर्नेछौं । सरकार तपाईहरुको साथमा छ ।”– उहाँले भन्नुभयो ।

रमदैया टोलमा अहिलेसम्म १४ जनाको मृत्यू भएको भनेर भनेपछि प्रहरीको तथ्याँक अनुसार मृतक सबै परिवारले ३-३ लाख रुपैयाँ पाउने भएको छ ।

यसका साथै, पीडित परिवारसँग भाव्हील भएका मुख्यमन्त्री राउतले पक्राउ गरिकाहरु उपर ज्यान मुद्दा चलाउने आश्वासन दिनुभएको छ ।

मुख्यमन्त्री राउतसँगै प्रदेश नं. २ का आन्तरिक मामिला तथा कानुन मन्त्री ज्ञानेन्द्र कुमार यादव समेत पुग्नुभएको थियो ।

आईतबार पूर्व मन्त्री रघुवीर महासेठले पीडित परिवारलाई किरिया खर्च स्वरुप जनही २०/२० हजार रुपैयाँ दिनुभएको थियो ।