स्कूलको भवन पुरानो संरचना भत्काएर गुणस्तरीय बनाउँदै छौं : मेयर गोईत

न्यूज ब्यूरो, जनकपुरधाम । धनुषाको कमला नगरपालिकाका मेयर राम उदगार गोईतले गुणस्तरियहिन भनिएको विद्यालयको भवन पुनः भत्काएर बनाएको बताउनुभएको छ ।

बालबालिकाहरुको भविष्यसँग कुनै प्रकारको सम्झौता नगरिने बताउँदै उहाँले कमला नगरपालिका वडा नं. २ को खोक्साहा पूल नजिक निर्माणधिन विद्यालय भवन गुणस्तरीय नै निर्माण भईरहेको दाबी गर्नुभएको छ ।

केही महिनाअघि मिस्त्रीको लापरवाहीको कारण मापदण्ड अनुसार निर्माण कार्य नभएको अवस्थामा नगरपालिकाको टोलीले अनुगमन गर्दै मापदण्ड अनुसार बनाउन लागिएको बताउनुभयो ।

यसअघि बर्षाका कारण पर्खालमा हल्का समस्या मात्र आएको स्वीकार गर्दै उहाँले त्यसलाई पनि भत्काएर नयाँ मजबुत सँरचना निर्माण गर्न लागिएको बताउनुभएको छ । प्रदेश सरकारको सशर्त अनुदानमा कमला नगरपालिका मार्फत उक्त निर्माण कार्य भईरहेको बताइएको छ ।

यता, कमला नगरपालिकाका ईन्जिनीयर लखनदेव यादवले समेत पुरानो संरचना भत्काएर ईस्टिमेट बमोजिम नै कार्य गर्न लगाइएको बताइएको छ । उहाँले कुन कुन ठाउँमा पिलर, कति सुताको रड हाल्ने भनेर मापदण्ड अनुसार नै कार्य सुचारु गरिएको बताउनुभयो ।

मापदण्ड विपरित भए उपभोक्ता समितिलाई काजगी प्रक्रिया अघि नबढने तथा पूर्ण मापदण्ड बमोजिम नगरेसम्म भवन निर्माण कार्य समेत अगाडी नबढने सँकेत गर्नुभयो ।

सोही क्रममा वडा नं. २ का वडाध्यक्ष धनेश्वर यादवले समेत पुरानो संरचनालाई भत्काएर नयाँ संचरना अनुसार पूर्ण मापदण्डको अधिनमा रही भवन निर्माण कार्य भईरहेको बताउनुभयो । उहाँले वडाका र नगरका बालिबालिकाहरुको भविष्य र ज्यानसँग कुनै प्रकारको सम्झौता नगरिने बताउनुभयो ।