प्रदेश २ को नामः 'मधेश' साझा

न्यूज ब्यूरो, जनकपुरधाम । प्रदेश नं. २ को नामाकरण गर्ने उपर अहिले राजनीतिक दलहरुको छलफल जारी रहेको छ ।

प्रदेश नं. २ को नामाकरणको लागि अहिले आन्तरिक छलफल भईरहेको छ । सो बिषयमा दलहरुबीच करिब करिब सहमति समेत भएको हो । मधेशलाई कमन अर्थात साझा राखी प्रदेशको नामाकरण हुनुपर्नेमा केन्द्रीत गरिएको जनाइएको छ ।

विभिन्न दलहरुले उठाएको प्रदेशको नामको लागि सहमति करिब करिब अन्त्यसम्म रहेको बताइएको छ । प्रदेशको नाम जस्तोसुकै राखिएपनि त्यसमा मधेश शब्दलाई अभिन्न शब्दको रुपमा अघि सार्दै छलफल जारी रहेको छ । विभिन्न दलले प्रदेश नं. २ को नामको किटानको लागि विभिन्न नाम दिएका छन् ।

नामाकरणको क्रममा प्रदेश सरकारको प्रमुख प्रतिक्षको रुपमा रहेको नेपाली काँग्रेसले प्रदेश नं. २ को नाम मिथिला मधेश अघि सारेको छ । नेपाली कांग्रेसको तर्फबाट संसदीय दलका नेता रामसरोज यादवले प्रदेशको नामाकरण सन्दर्भमा सहमतिका लागि प्रदेशको नाम ‘मिथिला मधेस’ हुनुपर्ने प्रस्ताव अघि सारेको बताइएको छ।

प्रदेश सरकारको अर्को प्रतिपक्षको रुपमा रहेको नेकपा संसदीय दलका नेता सत्यनारायण मण्डलले पार्टी अनुकुल ‘जानकी मधेस’ नामाकरणको लागि प्रस्ताव अघि सार्ने बताएका छन् । प्रदेशको नाममा मधेश अनिवार्य प्रतिपक्ष दलहरुले लगाएको छ ।

यता, सत्तारुढ समाजवादी पार्टी र राष्ट्रिय जनता पार्टी प्रदेश २ को नाम ‘मधेस प्रदेश’ हुनुपर्ने अडान लिदै आएको छ । संघीय समाजवादी पार्टी र राजपा नेपालले मधेशको इतिहास र मधेश आन्दोलनलाई सँस्थागत गर्न पनि मधेश प्रदेश नाम हुनुपर्ने माग राख्दै आएको छ ।

यसअघि देखि नै प्रदेश नं. २ का मुख्यमन्त्री मो. लालबाबु राउतले प्रदेशको नाम 'मधेश' नै हुने अडान लिदै आएका छन् । मुलुकमा संघीयता स्थापना गराउन मधेश आन्दोलनको सम्मानका लागि भएपनि नाम मधेस प्रदेश हुनुपर्ने धारणा राख्दै मधेश प्रदेशको लागि पनि सहमति चाँडै हुने बताएका छन् ।

यता, प्रदेश नं. २ को स्थायी राजधानीको बारेमा पनि छलफल तीव्र पारिएको जनाइएको छ । आगामी फागुन १५ गतेभित्र लगभग प्रदेशको नाम र स्थायी राजधानी नाम सहित तोकिने जनाइएको छ ।