प्रदेश २ को नामाकरण विवाद किनारा लगाइँदै

न्यूज ब्यूरो, जनकपुरधाम । प्रदेश २ को नाममा सहमति खोज्न आज बसेको उच्च स्तरीय संसदीय समितिको बैठक विना निश्कर्ष टुंगिएको छ ।

जनकपुरलाई स्थायी राजधानी तोक्न दलहरुबीच सर्वसम्मति भए पनि नामकरण विवाद सुल्झन सकेको छैन । यद्यपी नेताहरुले सहमति नजिक रहेको बताएका छन् ।

प्रदेशको नामाकरण गर्नका लागि सभामुख सरोजकुमार यादवको संयोजकत्वमा उच्चस्तरीय संसदीय समिति गठन गरिएको छ । सोही समितिको बुधबारको बैठकमा सबै दलका प्रतिनिधि नामाकरणमा चाँडै सहमति खोज्न एकमत भएका हुन् ।

चाँडो नामाकरण गर्ने बिषयमा सबै दल एकमत देखिएको प्रमुख प्रतिपक्षी नेपाल कम्युनिष्ट पार्टी (नेकपा) का संसदीय दलका नेता सत्यनारायण मण्डलले जानकारी दिए । नेकपाले आफूले प्रस्ताव गरेको जानकी नाममा मधेश थपेर नामाकरण गर्नुपर्ने बताए । नेपाली कांग्रेसले मिथिला मधेश भनेर नामाकरण गर्नुपर्नेमा जोड दिएको छ ।

कांग्रेस संसदीय दलका नेता रामसरोज यादवले चाँडो नामाकरण गर्नका लागि मिथिला मधेश नामाकरण गर्न विकल्प दिएको जानकारी दिए । सत्तारुढ समाजवादी र राष्ट्रिय जनता पार्टी (राजपा) ले मधेश नामाकरण गर्नुपर्ने प्रस्ताव गरेको छ । राष्ट्रिय जनता पार्टी (राजपा) का सचेतक परमेश्वर साहले बैठकमा नेताहरु लचकताका साथ प्रस्तुत भएको जानकारी दिए ।

प्रदेशको नामाकरणका लागि दुई तिहाई बहुमत आवश्यक पर्छ । तर, प्रदेशमा कुनै पनि दलसँग त्यो अवस्था छैन । प्रदेशको नामाकरणका लागि आगामी फागुन ४ गते पुनः बैठक बस्नेछ ।

फागुन ८ गते बस्ने बैठकमा नेकपा, समाजवादी, राजपा र कांग्रेसका संसदीय दलका नेता, सभामुख र सचेतकहरु बसेर प्रदेशको नामाकरणलाई निष्कर्षमा पु¥याउने विश्वास लिइएको छ ।