सिरहामा बसले मोटरसाइकललाई ठक्कर दिँदा २ को मृत्यु

न्यूज ब्यूरो, सिरहा । सिरहामा बसले ठक्कर दिँदा मोटरसाइकलमा सवार दुईजनाको मृत्यू भएको छ ।

सिरहाको नरहा गाउँपालिका ५ स्थित सोमबार बिहान साढे ५ बजे ना ४ ख ९२४१ नम्बरको बसले लु १६ प ४४४१ नम्बरको मोटरसाइकललाई ठक्कर दिएको हो । ठक्करबाट गम्भीर घाइते भएका सिरहा नगरपालिका ३ रमौलका २९ वर्षीय अमन मण्डल र मखनाहाका ४५ वर्षीय शैलेन्द्रकुमार मण्डलको मृत्यु भएको सिरहा प्रहरीले जनाएको छ ।

अमनको उपचारको क्रममा विराटनगरस्थित न्यूरो अस्पतालमा मृत्यु भएको हो भने शैलेन्द्रको लहानको रामकुमार सारडा उमाप्रसाद मुरारका स्मारक अस्पतालमा उपचारकै क्रममा बिहान ७ बजे मृत्यु भएको सिरहाका प्रहरी उपरीक्षक उमाप्रसाद चतुर्वेदीले जानकारी दिए ।

यता, ठक्कर दिने बस प्रहरीको नियन्त्रणमा रहेको छ भने बसका चालक फरार छन् । उनको खोजीकार्य भइरहेको प्रहरीले जनाएको छ ।