झुठो राजनीति गर्नेहरुको अब गुञ्जायस छैन : नेता यादव

न्यूज ब्यूरो, सिरहा । राष्ट्रिय जनता पार्टी (राजपा) नेपालका अध्यक्षमण्डलका सदस्य एवं संघीय सांसद राजकिशोर यादवले जनतालाई ठगेर राजनीति गर्दै आएका नेताहरुको अब गुञ्जायस नरहेको बताएका छन् ।

सिरहा निर्वाचन क्षेत्र नम्बर ४ का प्रतिनिधिसभा सांसद यादवले शुक्रबार आफ्नो निर्वाचन क्षेत्रमा विभिन्न योजनाको शिलान्यास गर्दै यस्तो बताएका हुन् । उनले जनता विस्तारै सचेत हुँदै गएको भन्दै झुठो राजनीति गर्नेहरुलाई जनताले नै तह लगाउने बताए ।

जनताको बीचमा आएर जनतालाई हरेक दृष्टिकोणबाट खुशी पार्नसक्ने नेताको मात्रै अब गुञ्जायस रहेको उनले तर्क गरे । प्रतिनिधिसभा सांसदमा निर्वाचित भएदेखि नै विकास निर्माणका कामलाई प्राथमिकतामा राखेर अघि बढेका नेता यादवले नेताहरुकै धोकाधडीका कारण समाज पछाडि परेको भन्दै दुःख व्यक्त गरे ।

समाज र समग्र देशको स्तर उकास्न सबैले जिम्मेवार बन्नुपर्ने नेता यादवले धारणा राखे । शुक्रबार सांसद यादवले विष्णुपुर गाउँपालिका ४ अन्तर्गत थलहा गाउँदेखि करहर्वासम्मको सडक कालोपत्रेको लागि शिलान्यास गरेका हुन् । कालापत्रेको लागि संसदीय विकास कोषबाट एक करोड रुपैयाँ विनियोजन गरिएको छ । यस्तै, सोही वडास्थित महरा टोलमा सामुदायिक भवनको पनि आजै शिलान्यास गरिएको छ ।

नेता यादव शुक्रबार नेपाल रेडक्रस सोसाइटी सिरहा शाखाको दोश्रो वार्षिकोत्सव कार्यक्रममा समेत सरिक भए ।