शहिदनगरको सबै विद्यालय सुधार्ने संकल्प लिन्छु : मेयर बरबरिया

न्यूज ब्यूरो, जनकपुरधाम । धनुषाको शहिदनगर नगरपालिकाका मेयर उदय कुमार बरबरिया (यादव) ले शहिदनगरको सबै विद्यालयलाई सुधार गर्ने सँकल्प लिनुभएको छ ।

बुधबार (आज) धनुषाको शहिदनगर नगरपालिका वडा नं. ३ राष्ट्रिय प्राथमिक विद्यालय यदुकूहामा सरस्वति मन्दिरमा मूर्ति (प्रतिमा) स्थापना गर्दै मेयर बरबरियाले नगरभित्रको सबै समुदायिक विद्यालयहरुलाई सुधारको सँकल्प लिएको बताउनुभयो ।

नगरपालिकाको सहयोगमा उक्त विद्यालयमा निर्माण भएको मन्दिर सहित मूर्ति स्थापना गर्दै उहाँले विद्यालयको पठनपाठन, अध्ययनअध्यापन र शिक्षा नीतिमा सुधार ल्याउने सँकल्प लिनुभएको हो । पूजामा बस्दै मेयर बरबरियाले उपस्थित शिक्षक, विद्यार्थी तथा समाजसेवी भद्रभलादमीहरुको बीचमा शिक्षामा झन सुधारको संकल्प लिएको बताउनुभयो ।

“मेरो एक्लै सकल्पले कुनै कार्य पुरा हुँदैन, तपाईहरुलाई साक्षी राखेर माता सरस्वतिसँग विद्यालयहरुको सुधारको सँकल्प लिएको छु । तपाईहरुले पनि हामीलाई साथ दिनुपरयो । तपाईहरुको साथ विना हामी कुनै कुरा पूर्ण गर्न सक्दैनौ । हातमा हात मिलाएर विद्यालयको अवस्थाको सुधारको सँकल्पलाई पूरा गर्नको लागि माता सरस्वतिलाई साक्षी राखेको छु ।”– उहाँले भन्नुभयो ।

मन्दिर उदघाटन तथा मूर्ति स्थापना कार्यक्रममा समाजसेवी लालबाबू हाथी, विद्यालयका प्रधानाध्यापक, शिक्षक शिक्षिका, स्थानीय, विद्यार्थीहरुको सहभागीता रहेको थियो ।