सिरहा : जीवन मृत्युबीच जुधिरहेका परिवारलाई हेल्प मधेशीको सहयोग

न्यूज ब्यूरो, सिरहा । समाजिक संस्था हेल्प मधेशीले सिरहाको मिर्चैया नगरपालिकामा हेमो फोलिया रोगले ग्रस्त एकजना बालकको उपचारको लागि आर्थिक सहयोग प्रदान गरेको छ ।

बैदेशिक रोजगारीको शिलशिलामा विभिन्न खाडी मुलुकमा बस्दै आएका नेपालीहरुको समाजिक संस्था हेल्प मधेशीले मिर्चैया नगरपालिका ७ फूलबरिया निवासी लालबाबु खान परिवारलाई उपचारको लागि आर्थिक सहयोग गरेको हो । उपचारार्थ जम्मा ७३ हजार १ सय ५१ रुपैयाँ सहयोग गरेको संस्थाले जनाएको छ ।

आर्थिक रुपले विपन्न खानका ५ वर्षीय छोरा हनैन खानको उपचारमा करिब १५ लाख रुपैयाँ खर्च भइसकेपनि हालसम्म निको भएको छैन । बैदेशिक रोजगारीको शिलशिलामा कत्तारमा रहेका खानकी श्रीमतिको समेत टाउको घाउ छ । आर्थिक अभावका कारण खानकी श्रीमति र अवोध छोरा जीवन र मृत्युबीच जुधिरहेका छन् ।

उनीहरुको उपचारको लागि मद्दत होस् भन्ने उद्देश्यले हेल्प मधेशी संस्थाले २१ हजार र हेल्प मधेशी कत्तारले ५१ हजार १ सय ५१ रुपैयाँ सहयोग प्रदान गरेको जनाएको छ । आर्थिक अभावमा उपचार गराउन सकिनरहेको खबर पाएपछि हेल्प मधेशी कत्तारका रामप्रकाश यादवले सहयोगार्थ अभियान चलाएका थिए ।

सहयोगार्थ अभियानबाट संकलित रकम हेल्प मधेशी नेपालका केन्द्रिय अध्यक्ष राम उदगार यादव, केन्द्रिय सदस्य संजय रान यादव, हेल्प मधेशी कत्तारका सेवक संतोष साह, हेल्प मधेशी नेपालका सेवक राकेश राय, राम प्रकाश पासवान लगायतले खानको घरमै पुगेर हस्तान्तरण गरेका छन् । सहयोग पाएपछि खान परिवारले संस्थाप्रति आभार प्रकट गरे ।

उपचार खर्च निश्चित नरहेकाले सक्ने सहयोग गरी ज्यान रक्षा गरिदिन अपिल पनि गरेका छन् ।