आज धनुषाको ढल्केवर बजार बन्द !

न्यूज ब्यूरो, जनकपुरधाम । पिछडा वर्ग समाज (ओबिसी) को पूर्व घोषित कार्यक्रम अनुसार आज (आईतबार) धनुषाको ढल्केवर बजार पूर्ण रुपमा बन्दको आव्हानसँगै बजार ठप्प भएको छ ।

अवैद्य उत्खननको विरोध गरेका धनुषा मिथिला नगरपालिका वडा नं. ५ श्रीपुर बस्ने दिलिप महतोलाई “प्रथम राष्ट्रिय पर्यावरण शहिद” घोषणाको गर्न माग गर्दै ढल्केवर बजार बन्द गरिएको हो । केही दिन अघि मात्र प्रदेश सरकारलाई ज्ञापन पत्र बुझाउँदै पिछडावर्ग समाजले दिलीपको हत्यामा सँलग्नलाई कारवाहीको माग गर्दै पर्यावरण शहिद घोषणाको लागि दबाब स्वरुप माघ ५ गते ढल्केवर बजार बन्दको आव्हान ज्ञापन पत्र मार्फत गरेको थियो ।

चुरे संरक्षणका अभियन्ता दिलिपको हत्यारालाई कडा कारवाही र अभियन्ता दिलिपलाई प्रथम राष्ट्रिय पर्यावरण शहिद घोषणा गर्न माग गर्दै ढल्केवर बन्दको आह्वान गरिएको पिछडावर्ग समाजका केन्द्रिय अध्यक्ष रामकुमार महतोले बताउनुभयो । आज दिउँसो १ बजे ढल्केवरमा विशाल ¥यालीको आयोजना गरिएको समेत बताउनुभयो ।

यो पनि पढनुहोस् : विहानै दुःखद खवर : 'अवैद्य उत्खननमा निगरानी राख्ने युवकलाई ट्रिपरले कुल्चेर मारे' !

प्रदेश नं. २ का आन्तरिक मामिला तथा कानुनमन्त्री ज्ञानेन्द्र कुमार यादवलाई ज्ञापन पत्र बुझाउँदै आज मनाइने बलिदानी दिवसमा दिलीपको पनि चर्चा गर्न तथा तस्विर झुण्डयाउन आग्रह गर्नुभएको थियो । पर्यावरण क्षेत्रको लागि बलिदानी दिएको भन्दै मन्त्री यादवलाई वीरगँजमा हुने बलिदानी दिवसमा दिलीपको चर्चा गर्न आग्रह गर्नुभयो ।

गत पुस २५ गते विहान करिब ४ बजेको समयमा धनुषाको मिथिला नगरपालिका–५ श्रीपुरस्थित घरनजिकैको औरही खोलामा अवैध उत्खनन् रोक्न गएको बेला टिपरले किचेर दिलिपको हत्या गरेको थियो । सोही आरोपमा ४ जनालाई धनुषा प्रहरीले पक्राउ गरी अनुसन्धान प्रक्रिया अगाडी बढाएको हो ।