अपन मिथिला सेवा समाजको आयोजनामा सर्लाहीमा सिलाई कटाई तालिम सुरु

न्यूज ब्यूरो, सर्लाही । समाजिक संस्था अपन मिथिला सेवा समाजको आयोजनामा सर्लाहीको मलंगवा नगरपालिकामा सिलाई कटाई तालिम शुभारम्भ गरिएको छ ।

सामाजिक रुपान्तरणको अभियानमा सक्रिय अपन मिथिला सेवा समाजले मलंगवा नगरपालिकाको आठ वडामा एकैपटक तीन महिने सिलाई कटाई तालिम सञ्चालन गरेको हो । तालिमको उद्घाटन वडा १ मा वडाध्यक्ष राजकिशोर राय यादव, वडा २ मा वडाध्यक्ष रामउजैन राय, वडा ३ मा वडाध्यक्ष रामकैलाश साह, वडा ५ मा प्रमोद सहनी, वडा ६ मा तैयव मियाँ, वडा ७ मा प्रमोद कुमार यादव, वडा ८ मा ईश्वरी श्रेष्ठ, वडा १० मा मुकेश झाले गरेका छन् ।

समाजको स्तर उकास्न तथा आत्मनिर्मर बनाउन विभिन्न अभियान चलाइरहेका अपन मिथिला सेवा समाजले यहाँका महिलाहरुलाई तीन महिने सिलाई कटाई सम्बन्धि प्रशिक्षण दिनेछ । सञ्चालन गरिएको तालिममा आठै स्थानमा ३०–३० जना महिला सहभागी रहेको अमिसेसका अध्यक्ष मंसाराम यादवले जानकारी दिए ।

सिलाई कटाई सम्बन्धि सीपमूलक तालिमको माध्यमबाट स्वरोजगार सृजना हुने र आर्थिक रुपमा समाजलाई सशक्त बनाउने विश्वास संस्थाको छ । यस संस्थाले प्रदेश २ को विभिन्न पालिकाहरुमा निरन्तर रुपमा सिलाई कटाई तालिम चलाइरहेको छ ।