प्रदेश २ : छोरी शिक्षा बिमा शिविर शुरु, नछुट्न आग्रह

न्यूज ब्यूरो, जनकपुरधाम । प्रदेश २ सरकारको महत्वाकांक्षी कार्यक्रम मध्ये एक ‘बेटी पढाउ, बेटी बचाउ’ अभियान अन्तर्गत छोरी शिक्षा बिमा कार्यक्रम शुभारम्भ भएको छ ।

प्रदेशका आठ वटै जिल्लामा बिहीबारदेखि एकैसाथ बिमा कार्यक्रम शुभारम्भ गरिएको हो । प्रदेशका मुख्यमन्त्रीदेखि विभिन्न मन्त्रीहरुले आठै जिल्ला पुगेर कार्यक्रमको उद्घाटन गरेका हुन् ।

सिरहामा प्रदेश २ का आर्थिक मामिला तथा योजनामन्त्री विजय यादवले कार्यक्रमको उद्घाटन गरे । मन्त्री यादवले सिरहाको कल्याणपुर नगरपालिकास्थित रेडक्रसमा आयोजित कार्यक्रममा एकजना बालिकाको बिमा खाता खाल्दै जिल्लाभर एकैसाथ बिमा शिविरको शुभारम्भ गरेका हुन् ।

जिल्लाका १७ वटै स्थानीय तहका वडाको संख्या हेरी १-२ दिन गर्दै आगामी फागुनको २ गतेसम्म यो शिविर सञ्चालन हुनेछन् । माघ १ गतेयता जन्मेकी छोरीहरुको प्रदेश सरकारले १३ हजार ६ सय ४६ रुपैयाँ १५ पैसाको निःशुल्क बिमा गर्नेछ ।

बिमा गरिएकी छोरीहरुले २० वर्षपछि १ लाख रुपैयाँ प्राप्त गर्ने जनाइएको छ । यो कार्यक्रम भयावह रहेको बालविवाह न्यूनिकरणको लागि रामवान सावित हुने विश्वास प्रदेश सरकारको छ ।