जनकपुर उपमहानगरका कर्मचारीद्धारा आन्दोलन घोषणा : भोलि 'पेन डाउन'

न्यूज ब्यूरो, जनकपुरधाम । जनकपुरधाम उपमहानगरपालिकाका कर्मचारी इकाई एसोसिएसन समितिले शुक्रबार कालोपट्टि बाँधी ‘पेन डाउन’ गर्ने घोषणा गरेको छ ।

मंगलबार दिउँसो केही पत्रकार र नगरप्रमुख लालकिशोर साहबीच भएको कुटपिटको विषयलाई लिएर कर्मचारीले आन्दोलनको घोषणा गरेका हुन् । समितिले प्रेस विज्ञप्ति जारी गर्दै शुक्रबार बिहान १० बजेदेखि दिउँसो १ बजेसम्म कालोपट्टि बाँधेर पेन डाउनको घोषणा गरेको छ ।

’२५ गते बिहान १० बजेदेखि १ बजेसम्म कालोपट्टि बाँधी पेन डाउन कार्यक्रम रहेको हुँदा नगरवासीमा पर्न गएको असुविधाको लागि क्षमाप्रार्थी छौं', समितिले जारी गरेको विज्ञप्तिमा उल्लेख छ ।

विवादित रहेको जानकी मन्दिरको फुलबारी अतिक्रमण सम्बन्धमा सञ्चारकर्मीहरू प्रतिक्रिया लिन जाँदा प्रमुखका सहयोगी र पत्रकारबीच कुटाकुट भएको थियो ।