प्रदेशसभा बैठक बस्दै नबसी स्थगित, भुक्तानी विवादले तनाव

न्यूज ब्यूरो, जनकपुरधाम । प्रदेश २ को आज बोलाइएको प्रदेशसभा बैठक बस्दै नबसी स्थगित भएको छ ।

प्रदेशसभा बैठक पुष २८ गतेसम्मका लागि स्थागित गरिएको हो । आज दिउँसो १ बजेका लागि बोलाइएको बैठक २८ गतेसम्मका लागि स्थगित गरिएको प्रदेशसभा सचिवालयले जनाएको छ ।

अब बैठक पुस २८ गते मंगलबार दिउँसो १ बजे निर्धारण गरिएको छ । यसअघि पुस १७ गते तोकिएको बैठक पनि बस्दै नबसी स्थगित भएको थियो । त्यसअघि पुस १४ र १५ गते आह्वान गरिएको प्रदेशसभाको बैठक प्रतिपक्षी तथा केही सत्तारुढ सांसद समेतले अवरुद्व गरेका थिए ।

गत आर्थिक बर्ष २०७५र७६ मा संचालन गरिएका योजनाहरुको भुक्तानी पाउनुपर्ने माग राख्दै सांसदहरुले लगातार प्रदेशसभाको बैठक अवरुद्ध गर्दै आएका छन् । गत बर्ष सञ्चालन गरिएका ८ सय ४२ वटा योजनाको झण्डै ९१ करोड रुपैयाँ भुक्तानी हालसम्म हुन सकेको छैन । सांसदहरुले भुक्तानी नपाएसम्म बैठक चल्न नदिने चेतावनी दिएका छन् ।

प्रदेशसभा बैठक बस्न नसक्दा प्रदेशको नामांकरण र स्थायी राजधानीको प्रस्ताव पनि अन्यौलमा परेको छ । दलहरुले गत भदौ ५ गते प्रदेशको नाम र राजधानीबारे प्रस्ताव संसदमा दर्ता गराएपनि यस विषयमा छलफल अगाडि बढ्न सकेको छैन ।