बलिदानी दिवसको विशेष समारोह यसवर्ष वीरगंजमा हुने

न्यूज ब्यूरो, जनकपुरधाम । मधेश आन्दोलनमा बलिदानी दिएका शहिदहरुको सम्झनामा मनाइने बलिदानी दिवस प्रदेश सरकारले यसवर्ष वीरगंजमा विशेष समारोहको आयोजना गरी मनाइने भएको छ ।

प्रदेश सरकार मन्त्रीपरिषद्को आजको बैठकले माघ ५ गते बलिदानी दिवस भव्यताका साथ मनाउने निर्णय गरेको हो । प्रदेश सरकारको आयोजनामा हुने उक्त कार्यक्रममा विभिन्न शीर्ष नेताहरुको सहभागिता रहने प्रदेश सरकारका प्रवक्ता एवं आन्तरिक मामिला तथा कानून मन्त्री ज्ञानेन्द्र कुमार यादवले जानकारी दिए ।

कार्यक्रममा मधेश आन्दोलनका शहिद परिवार एवं घाइतेहरुलाई सम्मान समेत गरिने जनाइएको छ । २०६३ साल यता मधेश केन्द्रित दलहरुले शहिदहरुको सम्झनामा मनाउँदै आएको बलिदानी दिवस गत वर्षदेखि प्रदेश सरकारले मनाउन थालेको हो ।

प्रथम मधेश आन्दोलन २०६३ सालयता मनाइँदै आएको बलिदानी दिवस प्रदेश सरकार गठन भएपछि गत वर्ष माघ पाँच गते सिरहाको लहानमा विशेष समारोहको आयोजना गरेर मनाइएको थियो ।