भिजिट मधेश नेपाल-२०२० को घोषणा, रविराजको अतिथि देवो भवः सार्वजनिक

न्यूज ब्यूरो, जनकपुरधाम । भारतबाहेक अन्य देशबाट नेपाल आएका विदेशी पर्यटकहरुको एक तिहाईलाई मधेश भ्रमण गराउने उद्देश्यका साथ ‘भिजिट मधेश नेपाल–२०२०’ घोषणा गरिएको छ ।

मंगलबार रिपोर्टर्स क्लब नेपालमा भिजिट मधेश नेपालले पत्रकार सम्मेलन गर्दै भिजिट मधेश नेपाल २०२० को घोषणा गरिएको हो । विगत २ वर्षदेखि सञ्चालनमा रहेको उक्त अभियानलाई आयोजकले यो वर्षपनि निरन्तरता दिएको छ ।

पत्रकार सम्मेलनमा यो वर्ष कम्तिमा पनि नेपाल भ्रमणमा आएका विदेशी पर्यटकहरुको एक तिहाई (भारतबाहेक) लाई मधेश भ्रमण गराउने उद्देश्य लिएको सुनाएको छ । सोही लक्ष्य बोकेर डिजिटल प्लाटफर्मपनि आज सार्वजनिक गरिएको छ । आयोजकले सार्वजनिक गरेको प्लेटफर्मममा ‘भिजिट मधेश डटकम’ र भिजिट मधेश नामक मोवाईल एप रहेका छन् ।

‘भिजट मधेशबिना भिजिट नेपाल अपुरो’ हुने आयोजको भनाइ छ । आयोजक संस्थाले जारी गरेको विज्ञप्तीमा भनिएको छ, 'भिजिट नेपाल इज इङ्कम्प्लिट विदाउट भिजिट मधेश’ हाम्रो भिजिट मधेश नेपालको मुल नारा रहेको छ । तराई मधेशको फरक हावापानी, पर्यावरण, एतिहासिक, पुरातात्त्विक, धार्मिक एवं प्राकृतिक सम्पदारधरोहरहरुले पर्यटकहरुलाई झन आकर्षित गर्न मद्दत गर्नेछ । तराई मधेशमा रहेका प्रचुर सम्भावना बोकेका गन्तव्यहरुको प्रवर्द्धन एवं संरक्षण गर्न सकियो भने नेपालको पर्यटन क्षेत्रमा थप ठुलो क्रान्ति हुन सक्छ। पर्यटकहरुको नेपाल बसाईको अवधी समेत बढन सक्ने सकारात्मक अवस्था सृजना हुने सम्भावना छ।'

तराई मधेशको २२ वटै जिल्लालाई जोड्दै पर्यटनमैत्री वातावरण निर्माण गर्ने 'भिजिट मधेस नेपाल' अभियान नागरिकस्तरबाट बिगत २ वर्षदेखि जारी रहेको आयोजकले जनाएको छ । विज्ञप्तीमा थप भनिएको छ, ‘यसले नेपालभित्र रहेका तराई–मधेसका पर्यटकीय गन्तव्य, संस्कृति, खानपान, रहनसहन, भेषभुषा एवं बिशेषताहरुलाई विभिन्न किसिमको कार्यक्रम सञ्चालन गरि राष्ट्रिय र अन्तर्राष्ट्रियस्तरमा प्रर्वद्धन एवं चिनाउदै अगाडि बढिरहेको छ । यो अभियानको लागि तराई मधेसको २२ वटै जिल्लामा जिल्ला, प्रदेश एवं राष्ट्रियस्तरको टिम स्वयंसेवकको रुपमा पर्यटनमैत्री वातावरण निर्माणमा लागेका छन्। साथै टिमहरुले आफ्नो जिल्ला, गाउँ–ठाउँका पर्यटकीय गन्तव्यहरुको बारेमा अध्ययन तथा अनुसन्धान र प्रचारप्रसार गर्ने कामहरू गरिरहेका छन् ।’ आयोजकका अनुसार अहिलेसम्म १२ वटा अन्य देशहरुमा पनि ग्लोबल रुपमा टिमहरु प्रवर्द्धनमा लागेका छन् ।

आन्तरिक एवं बाह्य पर्यटकहरुको सुबिधाको लागि भिजिट मधेसको डिजिटल प्लेटफर्म वेबसाईट र मोबाइल एप्स पनि तयार गरिएको र सो डिजिटल प्लेटफर्मबाट सेवाहरु बुकिङ, खरिद र बिक्री गर्नसक्ने अत्याधुनिक सुबिधा रहेको आयोजकको भनाई छ ।

विकास र समृद्धिमा पर्यटन क्षेत्रले ठुलो योगदान पुर्याउँदै आएकोले पर्यटनको बिकासले कुल ग्राहस्थ उत्पादनमा पनि अप्रत्याशित बढोत्तरी गर्नसक्ने र रोजगारको अवसरहरु सृजना गर्न कोशेडुङा साबित हुने आयोजकको विश्वास छ । विज्ञप्तीमा थप भनिएको छ,‘पर्यटन प्रर्वद्धनले सामाजिक चेतना विकास, सरसफाइ (पर्यावरण स्वक्षतामा सकारात्मक प्रभाव तथा स्थानीय पहिचान, कला, संस्कृतिको जगेर्ना र संरक्षण हुने, स्थानीय उत्पादन, हस्तकलाले बजार पाउने सम्भावनाहरु बढदै जान्छ। यो अभियानको ग्लोबल कोर्डिनेटर प्रमोद राज सरार्फ हुनुहुन्छ भने नेसनल कोअर्डिनेटरको रुपमा ओमप्रकाश सरार्फले नेतृत्व गर्नुभएको छ । र, कल्चरल एम्बेस्डरको रुपमा गायक रविराज साह हुनुहुन्छ ।’

उनले तराई मधेशका हरेक जिल्लामा हरेक विधाका पर्यटकीय महत्व बोकेका स्थान्हरु रहेको पनि सुनाए । ‘ती पर्यटकीय क्षेत्रहरुको विकास र समृद्धिबाट राष्ट्रिय पर्यटनको क्षेत्रमा समेत काँधमा काँध मिलाएर देशको आयलाई एक तिहाई योगदान बढाउन सक्छ । हामी यो अभियानमा लागिपरहेका छौं । आशा छ, हामी सफल हुन्छौं ।’

उनले भिजिट मधेश नेपाललाई आफूहरुले ‘डिजिटल मिरर अफ मधेश’ को रुपमा समेत चित्रण गरेको स्पष्ट पारे । ‘जसले हाम्रो त्यो क्षेत्रमा गतिविधि र वातावरण चलायमान बनाउँछ । यो अभियानले तराई मधेशमा ईन्भेष्ट ईन मधेश फर टुरिजमलगायतका केही अभियानपनि चलाईनेछ ।’–उनले थपे ।

उनले उक्त ईन्भेष्ट ईन मधेश फर एक्सपोर्ट भनेर पनि अभियान चलाउने बताए । उनले भने,‘यो अभियानअन्तर्गत एक्सपोर्ट फर नेपालमा पनि मधेशले एक तिहाई योगदान गर्न सक्छ । हामी यही तवरले पनि अघि बढिरहेका छौं । डिजिटल प्रविधि चाहनामात्रै होईन अब आवश्यकता भैसकेको छ । जसले हामीलाई २१ औं शताब्दीमा चिनिन मद्दत गर्नेछ । समृद्ध नेपालको सपना साकार पार्न पनि यो अभियानले टेवा पुग्नेछ ।’

विगत २० वर्षयता पहाड र हिमालमा जसरी पर्यटनको विकास भएको छ त्यो रफ्तारमा तराई मधेशको पर्यटनको विकास नभएको उनको गुनासो छ । उनले भने,‘जुन जुन क्षेत्रमा गत २० वर्षमा पहाड र हिमालमा पर्यटनको विकास भएका छन्, हामीले तराई मधेशमा पनि ती क्षेत्र अनुशरण गर्ने उद्देश्य राखेका छौं ।’ उक्त अभियानसँगै भिजिट मधेश नेपाल–२०२० एण्ड बियोण्ड सुरु भएको सर्राफको भनाई छ । उनले भने,‘हामीले भिजिट नेपाल–१९९८, भिटिट नेपाल–२०११ र भिजिट नेपाल–२०२० पनि कुर्यौं । अब भने भिजिट मधेश नेपाल २०२० एण्ड बियोण्ड सुरु भैसक्यो ।’

कार्यक्रममा भिजिट मधेश नेपालका सांस्कृतिक दूत समेत रहेका गायक रविराज साहले गाएको मधेशको पर्यटनसम्बन्धी ‘भिजिट मधेश नेपाल’ को गीत पनि सार्वजनिक गरिएको छ । लोकस्टार साहले ‘संस्कार जहाँके अतिथि देवोः भवः’ बोलको गीत सार्वजनिक गरेका हुन् ।

त्यस्तै उनले ‘भिजिट मधेश, घुमी मधेश, देखी मधेश’ को पनि उद्घोष गरेका छन् । उक्त गीतका रचनाकार भने आनन्द अस्तित्व हुन् । कार्यक्रममा मधेशी पत्रकार समाजका अध्यक्ष मोहन सिंहले उक्त अभियानलाई शुभकामना दिएका थिए ।

त्यस्तै, कार्यक्रममा अभियानका सरसफाई दूत बैद्यनाथ साहले पुरै तराई मधेशमा सरसफाई अभियान सञ्चालन गर्दै आएको सुनाए । आगामी दिनमा पनि यो अभियानलाई निरन्तरता दिइरहने विश्वास दिलाए ।