काम लिएर आउनुस्, बजेट दिन तयार छु : मेयर यादव

न्यूज ब्यूरो, सिरहा । सिरहाको मिर्चैया नगरपालिकाका नगरप्रमुख श्रवण यादवले सुशासन, पूर्वाधार विकास, सामाजिक विकास, आर्थिक विकासलाई प्राथमिकता दिएर नगरपालिकाले कार्य गरिरहेको बताएका छन् ।

मेयर यादवले नगरबासीको माग र चाहना बमोजिमका योजनाहरुलाई प्राथमिकता दिएर नगरपालिकाले कार्य गरिरहेको बताएका हुन् । उनले सडकबाटो निर्माण, शिक्षा, स्वास्थ्य, कृषि लगायतका क्षेत्रको विकास र प्रवद्र्धनका लागि कार्य गरिरहेको बताए ।

नगरप्रमुख यादवले झरी सिजनमा हुने गरेको नगर डुबानको समस्यालाई समाधान गर्न पनि अगाडि बढिसकेको जानकारी गराए । उनले हालै नगरभित्र ढल तथा नाला निर्माणको लागि एडिएफसँग सम्झौता भएको जानकारी दिए ।

आगामी असारभित्र राजमार्ग छेउको दुबै नाला निर्माण कार्य सम्पन्न हुनेगरी सम्झौता भएको तथा त्यससँगै क्रमशः सबै नाला निर्माणको कार्य अघि बढ्ने उनले जनाए । जम्मा ५२ करोडको सो योजनामा नाला निर्माणको लागि एडिएफलाई नगरपालिकाले १५ प्रतिशत अर्थात् ८ करोड दिनेगरी सम्झौता भएको हो ।

नाला निर्माण भएपछि वर्षायाममा घर तथा पसलमा पानी नजाने र सडकका खाल्डाखुल्डीमा पानी नजम्ने भन्दै डुबानको समस्या अन्त्य हुने उनले विश्वास लिए । उनले भने, ‘जतिबेला पानी पर्दा घरमै पानी पस्थ्यो, धेरै दुःख लाग्थ्यो । नगरपालिकाले पनि केही गरिरहेको छैन भनेर थुप्रै गुनासाहरु खेपे । तर, अब भने त्यो समस्या चाँडै अन्त्य गर्दैछौं ।’

नगरप्रमुख यादवले आफूले नगरबासी सन्तुष्ट हुनेगरी काम गर्न चाहेको भन्दै यसमा सबैलाई सहयोग गर्न अपिलसमेत गरे । नगर विकासको लागि चाहिएको आवश्यक सहयोगबारे आफूलाई जानकारी गराउन नगरबासीलाई अनुरोध गर्दै उनले आफू बजेट दिन तयार रहेको बताए । समृद्ध नगरको अभियानमा सबैलाई हातेमालो गर्न उनले नगरबासीलाई अग्रह गरे ।

यस्तै, उनले मिर्चैया स्मार्ट सिटीको परियोजनालाई पनि मूर्तरुप दिन कार्य अगाडि बढाइसकिएको समेत जानकारी दिए । भ्रमण वर्ष २०२० लाई लक्षित गरी नगरभित्रको पर्यटकीय क्षेत्रहरुलाई पर्यटक आकर्षित हुनेगरी काम गर्न लागेको पनि उनले जनाए ।

नगरको समग्र विकासका लागि प्राथमिकताको आधारमा योजनाहरु छनोट गरी कार्यान्वयन शुरु गरिएको उनको भनाई छ । मेयर यादवले नगरपालिकाबाट प्रदान गरिने सेवा प्रवाहलाई सरल, सहज र प्रभावकारी बनाइएको पनि बताए ।