छोरी शिक्षा बिमा सप्ताहको प्रचारात्मक अभियान शुरु

न्यूज ब्यूरो, जनकपुरधाम । मुख्यमन्त्री बेटी पढाउ, बेटी बचाउ अभियान अन्र्तगत संचालित छोरी शिक्षा बिमालाई प्रभावकारी बनाउन माघ २ गतेदेखि सञ्चालन गरिने बिमा सप्ताहको प्रचारात्मक अभियान सुरु भएको छ ।

मुख्यमन्त्री तथा मन्त्रीपरिषद्को कार्यालयले सप्तरी जिल्लाबाट प्रचारत्मक अभियान अन्तर्गत पहिलो चरणमा सरोकारबालाहरुको अन्तरक्रिया गरेको छ । जिल्ला समन्वय समितिको सम्वन्यमा आयोजित उक्त कार्यक्रममा जिल्लाका १८ वटै स्थानीयतहका प्रमुख एवं प्रशासकीय अधिकृत, राजनितिक दलका प्रतिनिधी, प्रमुख जिल्ला अधिकारी सहित सुरक्षा निकायका प्रमुखहरु, विभिन्न संघ सस्थाका प्रतिनिधिहरु सरिक थिए ।

कार्यक्रममा मुख्यमन्त्री तथा मन्त्रीपरिषद् कार्यालयका सचिव शंकर सुबेदीले विमा सप्ताहको उदेश्य तथा सरोकारबालाको भुमिका बारे जानकारी गराउदै सबैलाई सहयोग गर्न आग्रह गरे । माघ २ गते देखी सञ्चालन हुने विमा सप्ताहमा प्रत्येक स्थानीय तहमा शिविर सञ्चालन गरि २०७५ माघ १ गते पछि प्रदेश भरिमा जन्मिएका छोरीहरुको बिमा गर्नुका साथै स्वास्थ जाँच समेत गरिनेछ ।

शिविरमा बिमाका लागि आवश्यक जन्मदर्ता, स्थानीय तहको सिफारिस लगायतका सम्पूर्ण प्रकृया पुरा गरिने जनाइएको छ । स्थानीय तहले सञ्चालन गरिने उक्त शिविर मार्फत् माघ १ गते यता प्रदेशमा जन्मिएकी सबै छोरीको बिमा गर्ने लक्ष्य मुख्यमन्त्री तथा मन्त्रीपरिषद्को कार्यालयले लिएको छ ।

प्रचारात्मक अन्तरक्रिया कार्यक्रम १८ गते सिरहा, १९ गते धनुषा, २० गते पर्सा, २१ गते बारा, २२ महोत्तरी, २४ रौतहट, २५ सर्लाहीमा सञ्चालन गरिने जनाइएको छ ।