राजपाको बैठक बस्दै : राष्ट्रियसभा उम्मेदवार र उखु किसानको विषयमा छलफल हुने

न्यूज ब्यूरो, काठमाडौं । राष्ट्रिय जनता पार्टी (राजपा) नेपालले राष्ट्रियसभा चुनावका लागि उम्मेदवार चयन गर्न आज सचिवालयको बैठक बोलाएको छ ।

बबरमहलस्थित पार्टी कार्यालयमा दिउँसो १ बजे बस्ने बैठकमा राष्ट्रियसभा चुनावका लागि उम्मेदवारको चयन लगायत उखु किसानले गरिरहेको आन्दोलनको विषयमा छलफल हुने जनाइएको छ ।

राष्ट्रियसभा सदस्यका लागि आएका विभिन्न प्रस्तावहरुमाथि आज छलफल हुने बताइएको छ । पार्टी स्रोतका अनुसार हालसम्म राष्ट्रियसभा सदस्यका लागि ६०–७० जनाले दावी गरेका छन् ।

यीमध्ये दुईजनाको नाम छनौट गर्नुपर्ने हुन्छ । अध्यक्षमण्डलका लागि दुईजनाको नाम चयन गर्न फलामको च्युरासरह नै हुने अनुमान गरिएको छ । पुस २० गते राष्ट्रियसभा सदस्यका लागि उम्मेदवारी मनोनयन हुँदैछ ।