अयोध्याका जन्ती (बाराती) लाई जनकपुरमा भव्य स्वागत

न्यूज ब्यूरो, जनकपुरधाम । विश्व प्रसिद्धीको रुपमा रहेको भगवान राम र माता सीताकी विवाहमहोत्सव विवाहपञ्चमीमा भारतको अयोध्याबाट आएका जन्ती (बाराती) लाई जनकपुरमा भव्य स्वागत गरिएको छ ।

भारतको अयोध्यापाट दुई वटा रथमा झाँकीसहित आएको जन्तिलाई मार्गमा पर्ने विभिन्न ठाउँमा भव्य रुपमा स्वागत गरिएको हो । बुधबार साँझ नै महोत्तरीको मठिहानी पुग्दा भव्य स्वागत गरिएको जन्तीलाई अयोध्याबाट जनकपुरसम्म आईपुग्ने समय बाटोमा पुष्पवृष्टी (फूलको वर्षा) गरेर स्वागत गरिएको हो ।

जन्तीहरुलाई धनुषाका प्रमुख जिल्ला अधिकारी प्रदिपराज कणेलसहित नेपाली काँग्रेसका उपसभापति विमलेन्द्र नीधि, जानकी मन्दिरका महन्त, साधुसन्त लगायतले जनकपुरको बाह्रविघा मैदानमा अपरान्ह ४ बजेतर्फ भव्य स्वागत गरेको हो । रँगभूमि मैदानमै आयोजना गरिएको धनुषयज्ञमा समेत सहभागी भएका जन्तीहरुलाई जनकपुरधाम उपमहानगरपालिकाका प्रमुख लालकिशोर साह, उपप्रमुख रिता कुमारी मिश्र, नागरिक समाजका अगुवाहरु, उद्योगी, व्यवसायी तथा साधुसन्तहरुले भव्य रुपमा स्वागत गरेको हो ।

बिश्व हिन्दू परिषदका मन्त्री राजेन्द्र सिंह पंकजको अगुवाई तथा रामजन्मभूमि अयोध्याका सदस्य एवं महन्थ कमलनयन दास जी महाराजको अगुवाईमा पाँचसय बिशिष्ट साधुसन्त महन्थहरु भगवान राम तथा माता सीताको जयजयकार गर्दै जनकपुरधाम आईपुगेका हुन।

पाँच सयको संख्यामा आउनु भएको जन्तिलाई जनकपुरधामको मारवाडी सेवा समिति, रौनियार धर्मशाला तथा कलवार धर्मशालामा राख्ने र सोही ठाउँमा नै भोजन, नास्ता तथा बाँसको प्रबन्ध मिलाउने कामकाज भएको जानकी मंन्दिरका उत्तराधिकारी महन्थ एवं श्रीसीताराम विवाहपञ्ची महामहोत्सव मूल समितिका अध्यक्ष रामरोशन दास वैष्णवले जानकारी दिएका छन् ।

जनकपुरधाममा यस पटक भारतको अयोध्यावाट आएका जन्तिहरु पाँच दिनसम्म रहने भएको छ । विवाहपँचमीको भोलीपल्ट मंसिर १६ गते रामकलेवा पछि पुनः अयोध्यातर्फ प्रस्थान गर्नेछ । भगवान रामको जन्मभूमि अयोध्याबाट प्रत्येक वर्ष जन्ती आउने गरेको छ । त्रेता युगमा भगवान रामले सीतासँग धनुष यज्ञमा शिवधनुष भाँचेपछि विवाह भएको किम्बदन्ती अनुसार प्रत्येक वर्ष जनकपुरमा धुमधामका साथ विवाहपञ्चमी महोत्सव मनाईन्छ ।