मधेशसँग मेरो लभ छ, लभरलाई दुःख दिनेविरुद्ध अनसन बस्छु : प्रचण्ड

न्यूज ब्यूरो, निजगढ । नेपाल कम्युनिस्ट पार्टीका अध्यक्ष पुष्पकमल दाहाल प्रचण्डले मधेशमा विकास निर्माणको काम समयमा पूरा नगर्ने निर्माण व्यवसायीविरुद्ध आफू अनसन बस्न पनि तयार रहेको बताएका छन् ।

नेकपा प्रदेश २ ले बाराको निजगढमा मंगलबार गरेको आयोजना कार्यक्रममा उनले समयमा विकास निर्माणको काम पूरा नगर्ने ठेकदारलाई कारबाही गर्न सरकारलाई आग्रह गर्ने र कारबाही नभए आफैं आएर अनशन बस्ने बताएका हुन् । उनले भने, ‘म यसबारे सरकारलाई आग्रह गर्छ, सरकार गम्भीर भएन भने म तपाईहरुसँगै अनसन बस्छु ।’

पटकपटक मधेशसँग आफ्नो लभ परेको कुरा बताउँदै आएको प्रचण्डले त्यहाँ पनि मधेशसँग आफ्नो लभ परेको कुरा दोहोर्याए । लभरलाई दुख दिनेविरुद्ध आफै लड्ने प्रचण्डले बताए । प्रचण्डले मधेश आएर पटकपटक मधेशसँग आफ्नो लभ परेको बताउँदै आएपनि त्यसप्रति गम्भीर भने देखिँदैन ।

कार्यक्रममा उपप्रधानमन्त्री तथा रक्षामन्त्री ईश्वर पोखरेलले तराई मधेशका जनताको विकास र समृद्धिको यात्रामा ध्यान केन्द्रित गर्ने जिम्मेवारी सरकार र पार्टीको भएको भन्दै यो प्रक्रियामा अवरोध आउन नदिने बताए । उनले मधेशको विकासको लागि सरकार गम्भीर रहेकोसमेत बताए ।

पाखरेलले बारा, रौतहट, सर्लाहीका खेतमा पानीको अभाव हुन नदिने, सुनकोशी कमला डाइभर्सन आयोजनाबाट सप्तरी, सिरहा र धनुषाको सिञ्चाई समस्या समाधान गर्ने पनि बताए । हुलाकी राजमार्ग पनि निर्धारित समयमै निर्माण हुने प्रक्रिया अघि बढिसकेको उनले बताए ।