चुरेप्रति गम्भीर नभए तराई मधेश अबको २० वर्षमा मरुभूमि हुन्छ : पूर्वराष्ट्रपति यादव

न्यूज ब्यूरो, जनकपुरधाम । गणतन्त्र नेपालका प्रथम राष्ट्रपति डा. रामवरण यादवले चुरे नजोगाए अबको २० वर्षमा तराई मरुभूमि हुने बताएका हुन् ।

जनकपुरबाट काठमाडौं जानेक्रममा पारिवारिक भेटघाट भन्दै पत्रकारहरुसँग संक्षिप्त कुराकानी गर्दै पूर्व राष्ट्रपति यादवले यस्तो चिन्ता व्यक्त गरेका हुन् । चुरे संरक्षणको २० वर्षे गुरुयोजना संसदमा अलपत्र परेकोप्रति उनले दुःख प्रकट गरे ।

मधेशी तथा पहाडिया कुनै पनि सांसदले चुरेको कुरा संसदमा नउठाउँदा आफूलाई चित्त दुःखेको गुनासो उनले गरे । पूर्व राष्ट्रपति यादवले चुरेको कानुन बनेर गुरुयोजना कार्यान्वयन नभए ५१ प्रतिशत बसोवास रहेको तराई अबको ३० वर्षमा मरुभूमि बन्ने ठोकुवा गरे ।

पहाडको छातीमा यतिखेर करिव पौने दुईलाख वटा डोजर लगाएर चिरेको भन्दै पूर्व राष्ट्रपति यादवले तीनै तहका सरकारलाई जथाभावी नगर्न चेतावनी दिए । पहाडमा मेसिन लगाइएको र चुरे दोहन उत्तिकै भएकाले यसले विनास निम्त्याउने काम गर्ने भन्दै उनले वैज्ञानिक हिसावले काम गरी वातावरण सन्तुलन राख्न आग्रह गरे ।

उनले संविधान कार्यान्वयन र वातावरण सन्तुलन अहिलेको मुख्य चिन्ताको विषय रहेको बताए । पूर्व राष्ट्रपति यादवले भारतसँगको सीमा विवाद राजनीतिक र कूटनीतिक तरिकाले समाधान गर्न सरकारलाई सुझाव दिए ।