उपचुनावमा डा. सिके राउतको 'जलवा'

न्यूज ब्यूरो, जनकपुरधाम । आगमी मँसिर १४ गते हुन लागेको उप चुनावको लागि डा. सिके राउत आफैं ग्राउण्ड जिरोमा निस्केका छन् ।

जनमम पार्टीका राष्ट्रिय अध्यक्ष समेत रहेका डा. राउत आगमी मँसिर १४ गते हुन लागेको उपचुनावमा जनमत पार्टीको तर्फबाट उनले पनि उम्मेदवार खडा गरेका हुन् । मँगलबार महोत्तरीको पिपरामा आयोजना गरेको जनमत पार्टीको चुनावी सभालाई सम्बोधन गर्दै उनले मधेशी र मधेश नाम भँजाएर खाने पार्टीहरुसँग आफ्नो अमूल्य मत नबेच्न आग्रह गरे । डा. राउतलाई हेर्नको लागि पनि हजारौंको सँख्यामा उनका समर्थक एवम् प्रशंसकहरु ओर्लेका थिए ।

महोत्तरीको पिपरा गाउँपालिकाको अध्यक्ष पदको लागि जनमत पार्टीको तर्फबाट अञ्जली देवी मण्डलले उम्मेदवारी दिएकी हुन् । मधेशको नाम भँजाएर अन्य पार्टीहरुले मधेशीको अस्तित्व बेचेको भन्दै मधेश र मधेशीको अस्तित्व रक्षा गर्नको लागि जनमत पार्टीलाई मत दिन आग्रह समेत सार्वजनिक मँचबाट गरे । उनले भने, - "आफूलाई मधेशवादी दल भनाउने पार्टी सहित नेकपा, नेपाली काँग्रेस लगायतका पार्टीहरुले मधेशको र मधेशीको नाम बेचेर खाए । मधेश विरोधी तत्वसँग उनको अस्तित्व बेचेर खाए, मधेशी शहिदको रगतले लतपत मधेशको भूमिलाई पनि बेचे । सबै पार्टीलाई हेर्यौ सबैले धोका दियो, यसपाली जनमत पार्टीको लाउडस्पीकर छापमा मोहर लगाएर हेरौं, मधेशको गुमेको अस्तित्व फिर्ता ल्याउने काम मेरो ।"

चुनावी सभालाई करिब ३० मिनेटको सम्बोधनमा डा. राउतले पिपरा गाउाँपालिकाको अध्यक्ष पदको लागि जनमत पार्टीबाट लाउडस्पीकर (हरन) छापको लागि अञ्जली देवी मण्डलले उम्मेदवारी दिएको भन्दै पिपरा गाउँपालिकालाई स्मार्ट गाउँपालिका बनाउने जिम्मेवारी दिन अनुरोध समेत गरे । मधेशको लाईफलाईनको रुपमा रहेको हुलाकी राजमार्गमै पिपरा गाउँपालिका परेको भन्दै यसको सौभाग्य पिपरा गाउँपालिकावासीलाई प्राप्त भएको र त्यसलाई सँस्थागत गर्नको लागि जनमत पार्टीलाई भोट दिन आग्रह गरे ।

वैज्ञानिक समेत रहेका डा. सिके राउत नेतृत्वको जनमत पार्टीको जलवा भने पिपरा गाउँपालिकाको उपचुनावमा देखिएको हो । डा. राउत चुनावी सभालाई सम्बोधन गर्न पिपरा पुगेको खवरले पिपरावासी सहित आसपासका युवा, महिला, बुढापाखाहरुले समेत उनलाई हेर्नको लागि विहानैदेखि ओर्लेका थिए भने चुनावी सभाकै क्रममा जनमत पार्टीलाई यसपाली भोट गर्ने प्रतिवद्धता समेत त्यहाँका जनताहरुले गरेका थिए ।

मधेश र मधेशी जनता तथा मधेशी शहिदको सम्मान कायम राख्ने डा. सिके राउतले मधेश विकास र मधेशीको अस्तित्व रक्षाको लागि भोट मागेको बताएका छन् ।