विवाहपञ्चमीमा आउन भारतीय गृहमन्त्री साह र मुख्यमन्त्री योगीलाई निम्तो

न्यूज ब्यूरो, जनकपुरधाम । विवाहपञ्चमीमा सहभागी हुन भारत सरकारका गृहमन्त्री अमित साह र उत्तर प्रदेशका मुख्यमन्त्री योगी आदित्यनाथलाई निम्तो पठाइएको छ ।

जनकपुरधामस्थित जानकी मन्दिरमा प्रत्येक वर्ष भव्यताका साथ विवाहपञ्चमी मनाइने विवाहपञ्चमीमा सरिक हुन साह र योगीलाई निमन्त्रणा पठाइएको हो । भगवान राम र सिताको विवाह भएको दिनको स्मरणमा मनाइने विवाहपञ्चमीका दिन भारतको उत्तर प्रदेशस्थित अयोध्याबाट जन्तीको रुपमा भारतीयहरु आउने गर्छन् ।

भारतका गृहमन्त्री एवं सत्तासिन भारतीय जनता पार्टी (भाजपा) का अध्यक्ष अमित साह तथा उत्तर प्रदेशका मुख्यमन्त्री योगीलाई निमन्त्रणा पठाइएको जानकी मन्दिरका उत्तराधिकारी महन्त राम रोशन दास वैष्णवले जानकारी दिए । उनले निमन्त्रणा पठाइएको जानकारी संघीय सरकारको पर्यटन मन्त्रालयलाई गराइसकेको जनाए ।

नेपाल सरकारले यसमा ध्यान दिए साह र यागी दुबै नेपाल आउने उनले बताए । यी दुईबाहेक भारतको अयोध्याका साधुसन्तहरुलाई पनि निमन्त्रणा पठाइएको छ । विवाहपञ्चमीमा जनकपुर आउन नेपालका राष्ट्रपति विद्यादेवी भण्डारी र प्रधानमन्त्री केपी शर्मा ओलीलाई पनि निमन्त्रणा दिइएको जनाइएको छ ।

यस पटकको विवाहपञ्चमी मंसीर १५ गते परेको छ । तर, विशिष्ट अतिथीहरुलाई १३ गते नै जनकपुर आउने गरी निमन्त्रणा पठाइएको दासले बताए । विवाहपञ्चमीको अहिलेदेखि नै जोड्तोडले तयारी थालिएको छ ।