जनकपुरबाट बिजुली चोरेर प्रयोग गर्ने ३६ फन्दामा

न्यूज ब्यूरो, जनकपुरधाम । जनकपुरधाम उपमहानगरपालिकामा विद्युत चुहावट गर्ने ३६ जनालाई पक्राउ गरिएको छ ।

नेपाल विद्युत प्राधिकरण शाखा कार्यालय जनकपुरले गत बिहीबारदेखि सोमबार सम्ममा ३६ जनालाई पक्राउ गरेको जनाएको हो । जनकपुरधाम उपमहानगरपालिका कुवारामपुर, देपुरा रुपैठा, कटैया चौरी, लादो(बेला, मुसहरी टोल, आँखा अस्पताल एरिया, कुर्था, पुलचोकबाट उनीहरुलाई पक्राउ गरेको जिल्ला प्रहरी कार्यालय धनुषाका प्रहरी नायव उपरीक्षक रामेश्वर कार्कीले जानकारी दिए ।

विद्युत चोरीमा पक्राउ परेका सबै जनालाई नेपाल विद्युत प्राधिकरण शाखा कार्यालय जनकपुरमा ल्याएर प्राधिकरणको महसुल वापतको क्षतिपूर्ति लिई पक्राउ परेका सबैलाई आफन्तको जिम्मा लगाएर छाडिएको प्रहरीले जनाएको छ ।