शिक्षामा परिवर्तनको लागि सबैको सहकार्य जरुरी छ : शिक्षामन्त्री पोखरेल

न्यूज ब्यूरो, सिरहा । नेपाल सरकारका शिक्षा, विज्ञान तथा प्रविधिमन्त्री गिरीराज मणि पोखरेलले शिक्षामा क्षेत्रमा परिवर्तन आवश्यक रहेको बताएका छन् ।

सिरहाको गोलबजारमा आरम्भ साईन्स एण्ड कल्चर क्लब गोलजारको आयोजनामा शुक्रबारदेखि शुभारम्भ भएको ‘गोलबजार एक्सपो–२०७६’ लाई उद्घाटन गर्दै मन्त्री पोखरेलले यस्तो बताएका हुन् । उनले अहिलेको शिक्षा प्रणाली नै गलत रहेको जिकिर गर्दै यसको परिवर्तन जरुरी रहेको बताए ।

अहिलेको घोकाउने शिक्षा प्रणाली र तीन घण्टे परीक्षाको आधारमा सक्षमताको प्रमाण पत्र दिने प्रणाली नै गलत भएको उनले बताए । मन्त्री पोखरेलले यस किसिमको शिक्षा प्रणालीलाई तोड्नुपर्ने र लोकतान्त्रिक गणतन्त्र मुलुक नेपालमा यस्तो प्रणाली स्वीकार्य नरहेको तर्क गरे । शिक्षा क्षेत्रमा अनुभूती गर्ने खालको परिवर्तनको लागि शिक्षक, विद्यार्थी र अभिभावकसहित सबैको सकारात्मक सहकार्य जरुरी रहेको उनले बताए ।

स्कूलका शिक्षकहरुले पुरानो ढर्राबाट शिक्षण सिकाई नगरी नयाँ शिक्षा पद्धती र प्रबिधि अनुसार शिक्षण गराउनुपर्ने धारणा उनले राखे । मन्त्री पोखरेलले प्राविधिक शिक्षामा जोडसमेत दिए । उनले नेपालमा सबै नागरिकले अनिवार्य प्राविधिक तालिम लिनुपर्ने बताए ।

कार्यक्रममा प्रतिनिधिसभा सांसद लिलानाथ श्रेष्ठ, नेकपाका नेता एवं पूर्वमंत्री विश्वनाथ साह, प्रदेश सांसद रामकुमार यादव, गोलबजारका नगरप्रमुख देवनाथ साह लगायतका विशिष्ट व्यक्तित्वहरुको उपस्थिति थियो । सबैले आयोजक आरम्भ साईन्स एण्ड कल्चर क्लबले गरेको प्रयास र गर्दै आएको कार्यको खुलेरै सराहना गरे ।

गोलबजारस्थित श्री जनता नमूना उमाविको प्रांगनमा शुक्रबारदेखि सुरु भएको एक्सपो शनिवार समाप्त हुनेछ । एक्सपोमा सहभागी सिरहा जिल्लाका विभिन्न विद्यालयहरुका विद्यार्थीहरुले आफ्ना कलाले निर्माण गरेका सृर्जनाहरु स्टलमा राखी प्रदर्शनीको लागि राखेका छन् । एकसय ३० वटा स्टल रहेको एक्सपोमा विद्यार्थीहरुले उत्साहका साथ प्रदर्शीनी गरेको आयोजक क्लबका अध्यक्ष रामकुमार यादवले जनाए ।

एक्सपोमा सहभागीहरुलाई प्रदर्शनीका लागि सृजना गरेको बस्तुको निर्माणको आधारमा मूल्यांकन गरी क्रमशः पुरस्कृत गरिने आयोजक क्लबले जनाएको छ । समाजको पौराणिक कला तथा संस्कृतिलाई संरक्षणसहित समाजिक रुपान्तरणको मूल एजेन्डा लिएर सक्रिय यस क्लबद्धारा आयोजित एक्सपोमा विद्यार्थीभित्र लुकेर रहेको कला प्रष्टफुटन हेतु विभिन्न किसिमका प्रदर्शनी भइरहेको छ ।

कार्यक्रमको पहिलो दिन सहभागी विद्यार्थीहरुद्धारा विज्ञान, वातावरण, समाजिक र कला गरी चार संकायका प्रदर्शनी गरिएको छ भने दोश्रो दिन शनिबार मधेशको पौराणिक जाटजटिन, झिझिया, समाचकेवा लगायत अन्य विभिन्न भाषा र संस्कृतिका लोकनाच प्रस्तुत गरिने जनाइएको छ ।

सिरहा जिल्लामै यस्तो भव्य एक्सपो पहिलो पटक भएको आयोजकको दावी छ । यस एक्सपोबाट सैद्धान्तिक शिक्षालाई व्यवहारिक शिक्षासँग जोड्नेसहित विद्यार्थीमा लुकेका कला प्रस्टफुटन हुने र अरुलाई प्रेरित गर्ने आयोजक क्लबले विश्वास लिएको छ ।