आज हरिबोधिनी एकादशी : कमलदहमा भव्य मेला, श्रद्धालुको घुइँचो

न्यूज ब्यूरो, सिरहा । कार्तिक शुक्ल एकादशीका दिन आज औषधिको गुणले युक्त तुलसीको पूजाआराधना गरी श्रद्धापूर्वक हरिबोधिनी एकादशी पर्व मनाइँदैछ ।

हरिबोधिनी एकादशीका दिन तुलसीसँग विष्णुको विवाह र विशेष पूजा गरी मनाउने गरिएको हो । आषाढ शुक्ल एकादशी अर्थात् हरिशयनी एकादशीका दिनमा क्षीरसागरमा सुतेका विष्णु आज ब्युँझने भएकाले आजको एकादशीलाई हरिबोधिनी वा प्रबोधिनी एकादशी पनि भनिन्छ ।

एकादशीका दिन घरघरमा रोपेर विशेष पूजा गरिएको तुलसीको मठमा गाईको गोबर र रातो माटाले पोतेर सिँगारी फूलमालाले सजाएर विष्णुको तुलसीसँग विवाह गरिन्छ । तुलसी विष्णुप्रिया भएकाले सो दिन तुलसीको विवाह विष्णुसँग गर्ने परम्परा बसेको हो ।

हरिबोधिनी एकादशीको दिन आज सिरहाको मिर्चैया नगरपालिका–९ मा अवस्थित प्रसिद्ध धार्मिक स्थल कमलदहमा युवा–युवति तथा सर्वसाधारण श्रद्धालुहरुको घुइँचो लागेको छ । कमलदहमा हरिबोधिनी एकादशीका दिन लामो दुरीसम्मका विभिन्न स्थानबाट लाखौंको संख्यामा युवा–युवती तथा सर्वसाधारण श्रद्धालुहरु आउने गर्छन् ।

पौराणिक एवं धार्मिक महत्व बोकेको कमल फूलको नामले परिचित यस कमलदहमा स्नान गरेर पूजापाठ गरे मनोकांक्षा पूरा हुने मूख्य धार्मिक जनविश्वास रहिआएको छ । एकादशीको अवसर पारेर आजको दिनदेखि तीनदिनसम्म कमलदहमा भव्य मेला आयोजन गरिएको छ । यहाँ पौराणिक कालदेखि नै मेला लाग्दै आएको छ ।

मेलामा आयोजित कुस्ती कार्यक्रममा नेपाल र मित्र राष्ट्र भारतका नाम चलेका प्रख्यात पहलवानहरु सहभागी भएका छन् । कमलदहमा मेला भर्नको लागि विभिन्न छिमेकी ठाउँहरुबाट भारी संख्यामा सर्वसाधारणहरु आउने गर्छन् ।