मधेशकी बेटीलाई शिक्षित र सक्षम बनाउने अभियानमा छौं : मुख्यमन्त्री राउत

न्यूज ब्यूरो, जनकपुरधाम । प्रदेश २ का मुख्यमन्त्री लालबाबु राउतले प्रदेश सरकार प्रदेशका छोरीहरुलाई शिक्षित र सक्षम बनाउने अभियानमा लागि परेको बताएका छन् ।

धनुषाको मिथिला विहारी नगरपालिकाको जगरुप साह रामपुकार साह मावि परशुराम तलाउ र गंगा प्रसाद प्राविधिक मावि ठेरामा आयोजित साइकल वितरण समारोहलाई सम्बोधन गर्दै मुख्यमन्त्री राउतले समाजको आधा हिस्सा छोरीहरु शिक्षित र सक्षम नभएसम्म प्रदेश समृद्ध नहुने भएकाले प्रदेश सरकार यस अभियानमा अघि बढेको बताएका हुन् ।

उनले मुख्यमन्त्री बेटी पढाउ बेटी बचाउ कार्यक्रम अन्तर्गत छोरीहरुलाई शिक्षित र सक्षम बनाउन साइकल वितरण अभियान, छोरी शिक्षा विमा, सामुदायिक विद्यालयहरुमा छात्रा शौचालयको निर्माण अघि बढाएको उल्लेख गरे । छोरीहरु शिक्षित र सक्षम भइसकेपछि उनिहरुलाई रोजगारीमा समान अवसर दिन विभिन्न निकायहरुमा पचास प्रतिशत आरक्षणको व्यवस्था समेत गरेको बताउँदै मुख्यमन्त्री राउतले अबको १५ वर्ष पछि महिलाहरुले जिल्ला र प्रदेश चलाएर नमूना कायम गर्ने दावी समेत गरे ।

प्राबिधिक शिक्षा बिना प्रदेश समृद्ध हुन नसक्ने भन्दै उनले संविधानले प्रदत गरेको प्राविधिक र उच्च शिक्षा दिने प्रदेश सरकारको अधिकारलाई स्थापित गराउन प्रदेश सरकार छिट्टै प्राविधिक शिक्षा ऐन ल्याउन लागेको र त्यसपछि सामुदायिक विद्यालयहरुमा आवश्यकताको आधारमा प्राविधिक शिक्षाको अनुमति प्रदान गर्ने उल्लेख समेत गरे ।

दुबै विद्यालयमा आयोजित कार्यक्रममा आन्तरिक मामिला तथा कानून मन्त्री ज्ञानेन्द्र कुमार यादव, प्रदेशसभा सदस्य राम अशिष यादव, चमेली देवी दास, समाजवादी पार्टीका केन्द्रिय सदस्य महाजन यादव सहितको उपस्थिति रहेको थियो ।

छुट्टा छुट्टै आयोजित साइकल वितरण कार्यक्रममा जगरुप साह रामपुकार साह मावि परशुराम तलाउमा कक्षा ८ मा अध्ययनरत ६० र गंगा प्रसाद प्राविधिक मावि ठेरामा कक्षा ८ मा अध्ययनरत ७३ छात्रालाई साइकल हस्तान्तरण गरिएको हो ।