आलममाथि तेश्रो पटक ८ दिनको म्याद थप, उनी भन्छन्, 'घटनै भएको छैन'

न्यूज ब्यूरो, जनकपुरधाम । बम विस्फोट र विस्फोटमा परी घाइते भएकालाई इँटाभट्टामा हालेर हत्या गरेको अभियोगमा पक्राउ परेका कांग्रेस सांसद मोहम्मद अफताब आलमलाई तेस्रो पटक आठ दिनको म्याद थप गरिएको छ ।

जिल्ला न्यायधिश उमानाथ गौतमको इजलाशले आलमलाई आठ दिनको लागि थुनामा राखी अनुसन्धान गर्न प्रहरीलाई म्याद प्रदान गरेको हो । आलमलाई पहिलो चोटी ७ दिनको म्याद थप गरेर प्रहरीले अनुसन्धान प्रक्रिया अगाडी बढाएको थियो । तर, स्वास्थमा खराबी भएकोले ब्यान नसकिदा दोस्रो चोटि ५ दिनको लागि म्याद थपिएको थियो ।

म्याद थपपछि अदालत परिसरमा संचारकर्मीहरुसँग बोल्दै आलमले आफ्नो गिरफ्तारी असान्दर्भिक रहेको प्रतिक्रिया दिएका छन् । आलमले हुँदै नभएको घटनामा राजनितिक प्रतिसोधमा आफूलाई फसाइएको दावी गरे ।

आलम प्रकरणमा गम्भीरतापूर्वक अनुसन्धान भइरहेको सरकारी वकिल खडिन्द्र कटुवालले बताए । कटुवालका अनुसार, घटनाका एक घाइतेको फरेन्सिक टेष्ट गर्नुपर्ने आधारसहित बहस भएको छ ।