आलमलाई रिहा गर्न माग गर्दै कांग्रेसले भोली प्रदर्शन गर्ने

न्यूज ब्यूरो, रौतहट । घाइतेलाई जिउँदै जलाएको अभियोगमा पक्राउ परेका मोहम्मद अफ्ताव आलम पक्राउ विरुद्धमा भोली नेपाली काँग्रेसका कार्यकर्ताले कालोपटीसहित प्रदर्शन गर्ने भएका छन् ।

सरकारले आलमलाई १२ बर्ष अघिको झुठ्ठा मुुद्धामा फसाउन खोजेको भन्दै शुक्रबार काँग्रेस निकट कार्यकर्ताले जिल्ला सदरमुकाम गौरमा मुखमा कालोपटी बाँधेर मौन प्रदर्शन गर्ने भएका हुन् । नेपाली काँग्रेस जिल्ला कार्य समितिको निर्णयअनुसार भोली बिहान ११ बजे गौरमा मौन प्रदर्शन गरिने पार्टी जिल्ला सदस्य सुुमन गौतमले जानकारी दिए ।

गौतमले शुक्रबार बिहान निर्धा्रित समयमा गौरमा हुने प्रदर्शन सहभागी हुन सामाजिक सञ्जाल फेसबुकमार्फत जिल्लाका कार्यकर्ताहरुलाई आग्रह समेत गरेका छन् । गत असोज २६ गते प्रहरीले आलमलाई पक्राउ गरेपछि काँग्रेसले आपत्ति जनाउँदै आएको छ । यद्यपि, शुक्रबार हुने प्रदर्शन आलम निकट कार्यकर्ताको विशेष अनुरोधमा हुने भएको बताइएको छ ।

काँग्रेस जिल्ला सभापति कृष्ण यादवले विरोध प्रदर्शनका लागि पार्टीबाट औपचारिकरुपमा कुनै निर्णय नभएको बताए । उनले आफुु भने अनौपचारिकरुपमा शान्तिपूर्ण सहभागिता जनाउने बताए । प्रहरीले आलमलाई भोली पुनः अदालतमा पेस गर्न लागेका हुन् ।