सबैला नगरपालिकामा खोलिएको ताला पुनः लगायो

न्यूज ब्यूरो, जनकपुरधाम । धनुषाको सबैला नगरपालिकामा आज फेरी पनि तालाबन्दी गरिएको छ ।

सबैला नगरपालिका भित्र कार्यरत विभिन्न विद्यालयका शिक्षकहरुले तलब नपाएको भन्दै नगनगरपालिकाको कार्यालयमा ताला हानेका हुन् । वडा दशैं, दिपावली जस्ता चाडवाडका भत्ता र समयमा तलबसमेत नपाएको भन्दै उनीहरु ३ दिनको समय दिएर तीन दिनअघि नगरपालिकामा ज्ञापनपत्र बुझाएपनि सम्बन्धित पक्षले सुनुवाई नगरेको भन्दै तालाबन्दी गरिएको जनाइएको छ ।

आईतबार नगरपालिका कार्यालयमा तालाबन्दी गरिएपनि कुनै समान चोरी हुने डरले पुनः खोलेका थिए भने आज सोमबार पुनः विहानै तालाबन्दी गरेका हुन् । शिक्षकहरुले स्थानीय तह मूर्दावाद, तलब भत्ता उपलब्ध गराउनुपर्ने जस्ता नारावाजी गर्दै जनप्रतिनीधिहरु विरुद्ध तालाबन्दी गरेका हुन् । उनीहरुले तालाबन्दीको समयमा षडयन्त्रपूर्वक कुनै समान चोरी गरी आफूहरु उपर दोषारोपण गर्न सकिने भन्दै आईतबार लगाएको ताला आफै खोलेको थियो ।

आज तालाबन्दी गर्न जाँदा स्थानीय प्रहरीले उनीहरुलाई रोकेपछि ताला लगाउनबाट बञ्चित भएपनि कामकाज भने ठप्प गरेका छन् । दुरदराजबाट आएका सेवाग्राहीहरुमा समेत मार्का परेको छ भने नगरपालिकाको दैनिक कार्यसँचालनमा समेत असर परेको देखिएको छ । उनीहरुले आफूहरुको माग पुरा नभएसम्म आन्दोलन जारी राख्ने बताएका छन् ।

यता, नगरपालिकाका मेयर विजयशंकर साहले नगरपाकिाका प्रमुख प्रशासकीय अधिकृत स्वास्थ्य समस्याका कारण विदामा रहेको भन्दै समयमा तलब भत्ता उपलब्ध गराउन समस्या भएको स्वीकारे ।