सिरहा : विद्यालयमै रेडियो सञ्चालन, उद्घाटन गर्न आएका उद्योगमन्त्री यादवविरुद्ध प्रदर्शन

न्यूज ब्यूरो, सिरहा । सिरहामा उद्योग, वाणिज्य तथा आपूर्तिमन्त्री मातृका यादवको विरोधमा आफ्नै नेता कार्यकर्ताले प्रदर्शन गरेका छन् ।

सिरहाको कर्जन्हामा शुभकामना आदानप्रदान र सामुदायिक रेडियोको उद्घाटन गर्न आइतबार आएका मन्त्री यादवविरुद्ध नेकपाकै कार्यकर्ताहरुले प्रदर्शन गरेका हुन् । जनप्रतिनिधिलाई छलेर नगरको स्रोत अपारदर्शी ढंगले लगानी गरी सञ्चालन गरिएको रेडियो मन्त्रीले नै उद्घाटन गरेर साथ दिएको भन्दै विरोध गरिएको हो ।

कर्जन्हा नगरका ११ मध्ये ६ वटा वडाका वडाध्यक्ष, वडासदस्य, नेकपाका करिब एक दर्जन जिल्ला सदस्यसहित स्थानीय नेता–कार्यकर्ताको समूहले बस्तीपुर बजारमा मन्त्री यादवविरुद्ध प्रदर्शन र कोणसभा गरे । बस्तीपुर बजारमा बिहान ११ बजेदेखि भेला भएका असन्तुष्ट नेता–कार्यकर्ताको विरोध प्रदर्शन रोक्न ईलाका प्रहरी कार्यालय मिर्चैया र जिल्लाबाट समेत थप नेपाल प्रहरी र सशस्त्र प्रहरी मगाइएपनि विरोध प्रदर्शन र कोणसभा गरेका छन् ।

कर्जन्हा–११ स्थित जनसेवा मावि भवनको एउटा कोठामा स्टुडियो निर्माण गरी १ असोजदेखि परीक्षण प्रसारण प्रारम्भ भएको रेडियो गंगाजल ८७.८ मेगाहर्जको मन्त्री यादवले आइतबारदेखि विधिवत् उद्घाटन गरेसँगै विरोध सुरु भएको छ । बालबालिका पढ्ने विद्यालयमा रेडियो सञ्चालन गर्दा दैनिक पठनपाठनमा अवरोध पुग्ने भएपनि मेयरले मन्त्रीबाट नै उद्घाटन गराएर विरोधीहरूलाई ‘मन्त्री नै आफ्नो पक्षमा रहेको’ देखाउन खोजेको उनीहरुको आरोप छ ।

पार्टीको नेता र मन्त्रीभन्दा गुटको प्रतिनिधित्व गरेर कर्जन्हा आएकाले बाध्य भएर विरोध गर्नुपरेको नेकपाका स्थानीय नेता रामअवतार राईले बताए । उनले भने, ‘स्थानीये निर्वाचनपछि नगरका मेयरले गुटको आडमा बहुमत जनप्रतिनिधिलाई छलेर काम गरिरहेका छन्, सिंगो पार्टीलाई सबल बनाउनेभन्दा मन्त्रीले मेयरलाई मात्र काखी च्यापेर अगाडि बढ्न खोजेपछि विरोध गरिएको हो ।’