नेपाल भ्रमण वर्ष : धनुषाधाम संरक्षित वनमा 'ईक्सप्लोर मिथिला'

न्यूज ब्यूरो, जनकपुरधाम । नेपाल भ्रमण वर्ष २०२० लाई लक्षित गरी धनुषाको धनुषाधाम संरक्षित वनमा ईक्सप्लोर मिथिला नामक कार्यक्रम चलाइएको छ ।

मधेश मिथिलाको कला, संस्कृति, भोजन, पर्यावरण र जैविक विविधता संरक्षणको निम्ति पर्यटन विकास गर्न प्रचारप्रसार गर्ने उदेश्यले रामायणकालिन देवभूमि धनुषाधाम वनमा सो कार्यक्रम चलाइएको हो । सो कार्यक्रम अन्तर्गत मधेश मिथिलाका पौराणिक कला, संस्कृतिहरु प्रदर्शन गरिने गरिएको छ ।

विभिन्न ठाउँबाट आएका पर्यटकलाई २४ घण्टा त्यहीँ राखी पर्यटनको प्रचारप्रसार गरिरहेको मिथिला वाईल्ड लाईफ ट्रष्ठका अध्यक्ष देव नारायण मण्डलले जानकारी दिए । वनमा सहभागीहरुलाई वातावरणमैत्री पात, माटोको भाडामा मिथिला मधेश भोजनको परिकार खुवाएर मिथिला लोकनृत्य झिझिया देखाएर मनोरञ्जन गराइएको छ ।

नेपाल भ्रमण वर्ष २०२० लाई सफल बनाउने उदेश्यका साथ धनुषाधाम जंगलको वाणगंगा नदिको किनारामा कार्यक्रम आयोजना गरी पर्यटकहरुलाई स्थानीयहरुले मिथिला लोकनृत्य झिझिया नाच देखाएर मन्त्रमुग्ध बनाएका छन् ।