रिहा भएपछि सांसद साहले भने : 'विमानस्थल सुधार अभियान चलाउँछु'

न्यूज ब्यूरो, जनकपुरधाम । जनकपुर विमानस्थलमा बुद्ध एयरको काउण्टरमा तोडफोड गरेको आरोपमा पक्राउ परेका राजपा नेपालका सांसद प्रमोद साह साधारण तारेखमा रिहा भएका छन् ।

जिल्ला अदालत धनुषाका न्यायाधीश तेजनारायण पौडेलको इजलासले साहलाई साधारण तारेखमा छाड्न आदेश दिएको हो । सोमबार जनकपुरबाट काठमाडौंको बुद्ध एयरको उडान ढिलो भएको भन्दै सांसद साहले काउण्टरमा तोडफोड गरेका थिए ।

मंगलबार जिल्ला प्रहरी कार्यालयमा उनीविरुद्ध उजुरी परेपछि मंगलबारै त्रिभुवन अन्तराष्ट्रिय विमानस्थलबाट उनलाई प्रहरीले पक्राउ गरेको थियो । पक्राउ गरेर सांसद साहलाई जनकपुर ल्याइएको थियो । सरकारी वकिल कार्यालयले साहविरुद्ध गैरसैनिक हवाई उडान ऐन २०१५ को दफा ९ (क) को आधारमा अपराध गरेको कारणले उनिमाथि पाँच वर्षदेखि दस वर्षसम्मको कैद सजायको मागदाबीसहित जिल्ला अदालतमा मुद्दा दायर गरेको थियो ।

तर, अदालतले विमानस्थलमा वादविवाद भएको भएको तर सरकारी वकिलको कार्यालयको मागदावी नपुगेको भन्दै साधारण तारेखमा रिहा गर्न आदेश गरेको हो । रिहा भएपछि सांसद साहले विमानस्थल सुधारका लागि अभियान चलाउने प्रतिक्रिया दिएका छन् ।

सांसद साह पक्राउ परेलगत्तै राजपाले मधेशका विभिन्न जिल्लामा आन्दोलन चर्काएको थियो ।