जनकपुरमा गृहमन्त्री र पर्यटनमन्त्रीको पुतला दहन

न्यूज ब्यूरो, जनकपुरधाम । राष्ट्रिय जनता पार्टी (राजपा) नेपालले जनकपुरमा गृहमन्त्री रामबहादुर थापा र संस्कृति, पर्यटन तथा नागरिक उड्डयनमन्त्री योगेश भट्टराईको पुतला दहन गरेको छ ।

सांसद प्रमोद साहलाई झुठा मुद्दामा फसाएको भन्दै राजपा नेपाल धनुषाले मन्त्रीहरुको पुतला दहन गरेको हो । जनकपुर विमानस्थलस्थित बुद्ध एयरको काउण्टर तोडफोड गरेको आरोपमा पक्राउ परेका राजपा सांसद प्रमोद साहको पक्राउको विरोधमा राजपा नेपालले प्रदर्शनसहित पुतला जलाएको छ ।

राजपाका नेता तथा कार्यकताहरु भारी संख्यामा भेला भएर सरकार र प्रशासनविरुद्ध चर्को नाराबाजी गरेको छ । राजपा नेपालको आन्दोलन कार्यक्रम अन्तर्गत भोली शुक्रबार जुलुस प्रदर्शन गरिनेछ भने २ गते शनिवार धनुषा जिल्ला बन्दको कार्यक्रम गरिनेछ ।