सांसद साहको रिहाईको माग गर्दै मिर्चैयामा चक्काजाम र प्रदर्शन

न्यूज ब्यूरो, सिरह । विमानस्थल तोडफोडको आरोपमा पक्राउ परेका राजपा सांसद प्रमोद साहको रिहाईको माग गर्दै सिरहामा पनि प्रदर्शन गरिएको छ ।

जनकपुर विमानस्थलस्थित बुद्ध एयरको काउण्टरमा तोडफोड गरेको आरोपमा मंगलबार पक्राउ सांसद साहको पक्राउको विरोधमा राजपा नेपाल मिर्चैया र पार्टीको भातृ संगठन राष्ट्रिय विद्यार्थी संघको अगुवाईमा मिर्चैयामा प्रदर्शन गरिएको हो । राजपा नेपालका नेता कार्यकर्ताले बुधबार विहान मिर्चैयाको कटारी चोकमा एक घण्टा चक्काजाम गरी प्रदर्शन गरेका हुन् ।

उनीहरुले सांसद साहलाई विनासर्त रिहाइको माग गरेका छन् । सांसद साह सोमबार जनकपुर विमानस्थलको वुद्ध एयरको काउण्टरमा तोडफोड गरेका थिए । सांसद साहलाई मंगलबार प्रहरीले पक्राउ गरेको हो ।

हिजै पक्राउ गरी जनकपुर ल्याइएका सांसद साहलाई आज जिल्ला अदालत धनुषाले ४ दिनको म्याद थप गरेको छ ।