सांसद साह पक्राउको विरोधमा सुरु भयो आन्दोलन, जनकपुर तनावग्रस्त !

न्यूज ब्यूरो, जनकपुरधाम । जनकपुर विमानस्थलस्थित बुद्ध एयरको काण्टर तोडफोडको आरोपमा पक्राउ परेका राजपा सांसद प्रमोद साहको पक्राउविरुद्ध आन्दोलन सुरु भएको छ ।

विमानस्थलमा विरामीको अवस्था हेर्न नसकेर आक्रोशमा आएर तोडफोडमा गरेका सांसद साहको रिहाईको माग गर्दै राजपाले आन्दोलन सुरु गरेको हो । उनको पक्राउको विरोधमा जनकपुरसहित विभिन्न जिल्ला प्रदर्शन थालिएको छ ।

राजपा नेपालका नेता कार्यकर्ताले बुधबार विहान जनकपुरको रामानन्दचोकमा टायर बालेर चक्काजाम गरेका छन् । विहान ८ बजेदेखि ९ बजेसम्म १ घण्टा चक्काजाम गरी उनीहरुले सांसद साहलाई विनासर्त रिहाइको माग गरेका हुन् । सांसद साह सोमबार जनकपुर विमानस्थलको वुद्ध एयरको काउण्टरमा तोडफोड गरेका थिए ।

सांसद साहलाई प्रहरीले मंगलबार दिउँसो काठमाडौंको त्रिभुवन विमानस्थलबाट पक्राउ गरेको हो । उनलाई पक्राउ गरी जनकपुरमै ल्याइएको छ ।