धनुषा : एकैपटक ९ मोटरसाईकल जलेर ध्वस्त , सिँगो टोलमै रुवाबासी !

न्यूज ब्यूरो, जनकपुरधाम । धनुषामा एकै पटक ९ वटा मोटरसाईकल र ३ वटा साईकलमा आगजनी भएको प्रहरीले जनाएको छ ।

पूर्वी धनुषाको जनकनन्दिनी गाउँपालिका वडा नं. ३ प्रखे महुवामा पार्किंग गरि राखिएको ९ वटा मोटरसाईकल र ३ वटा साईकलमा आगलगी हुँदा जलेर ध्वस्त भएको हो । ईलाका प्रहरी कार्यालय खजुरीका प्रहरी नीरिक्षक राजन थापाका अनुसार आज विहान करिब ३ः३० बजेको समयमा पार्किंग गरि राखिएको मोटरसाईलमा आगलगी हुँदा जलेर पूर्ण रुपमा ध्वस्त भएको हो । आगो लागेपछि स्थानीयहरुले थाहा पाएलगत्तै आगो नियन्त्रणमा लिएपनि त्यतिबेला सम्म जलेर ध्वस्त भईसकेको थियो ।

सो आगलगीमा जनकन्दिनी गाउँपालिका वडा नं. ३ का वडाध्यक्षको सरकारी गाडी समेत जलेर ध्वस्त भएको छ । सो घटनामा ५ ओटा नेपाली प्लेट र ४ वटा भारतीय नम्बर प्लेटको मोटरसाईकल जलेर नष्ट भएको प्रहरी नीरिक्षक थापाले जानकारी दिए । त्यहाँ स्थित रहेको सार्वजनिक जग्गामा पार्किँग गरी राखिएको ज ९ प ७६२५ , स १ प ४३८१, स ८ प ७७१८ , ज १ प ९३३ (गाउँपालिकाको वडा नं. ३ को) र ज ६ प ७९९५ नम्बरको नेपाली प्लेटका मोटरसाईकलहरु जलेर ध्वस्त भएको हो ।

सोही आगलगीमा त्यही पार्किंग गरी राखिएको बिआर ३२ एन ५३३९, बिआर ३२ एफ ९३००, बिआर ३२ भि ३०८४, बिआर ३२ एफ ६०७८ भारतीय नम्बर प्लेटको मोटरसाईकल समेत जलेर ध्वस्त भएको हो । घटनामा ३ वटा हिरो कम्पनीको साईकल समेत जलेर नष्ट भएको छ । वडा नं. ३ को गणेश मन्दिर जाने बाटोमा रहेको एक सार्वजनिक जग्गामा जहाँ सामुदायिक भवन पनि निर्माण भईरहेको छ । सोही ठाउँमा स्थानीयवासीहरुले अघिदेखि नै प्रत्येक दिन सवारी पार्किंग गर्दै आएका थिए ।

एकैपटक ९ मोटरसाईकल र ३ साईकलमा आगलगी भएपछि सिँगो टोलमै रुवाबासी भएको छ । यता, ईलाका प्रहरी कार्यालय खजुरीले आगो आफैं लागेको वा कसैले लगाएको भनेर अनुसन्धान भईरहेको बताए । सबै मोटरसाईकल पँगतीबद्ध रुपमा पार्किंग गरिएकोले एउटामा आगलगी हुँदा सबैमा अति प्रज्वलनशिल वस्तु पेट्रोलले गर्दा लम्केको हुन सक्ने अनुमान गरिएको हो ।