दशैं खर्चको नाममा प्रहरी प्रशासनले चन्दा आतंक मचाए : प्रभु साह

न्यूज ब्यूरो, रौतहट । नेपाल कम्युनिष्ट पार्टी प्रदेश नम्बर २ का अध्यक्ष प्रभु साहले दशैं खर्चको नाममा सरकारी अफिसरहरुले चन्दा आतंक मचाएको आरोप लगाएका छन् ।

आइतबार रौतहट सदरमुकाम गौरमा आयोजित शुभकामना आदानप्रदान कार्यक्रम तथा युवा भेलालाई सम्बोधन गर्दै अध्यक्ष साहले सुरक्षा दिने निकाय स्वयं चन्दा आतंक मचाएको आरोप लगाएका हुन् । अध्यक्ष साहले अहिले बजारमा एक किसिमको आतंक मचेको र त्यो आतंक दशैं खर्चको नाममा चन्दाको भएको बताए ।

दशैं उपहारको नाममा घुसखोरीको भइरहेको आरोप लगाए । यस्ता खाले आतंक मच्चाउने गृह प्रशासन र सरकारी अफिसर भएको भन्दै दुःख व्यक्त गरे । जसले यस्ता अपराध र आतंक रोक्नुपर्ने हो त्यही पक्ष यसमा संलग्न भइरहँदा यसले गम्भीर प्रश्न उठाएको बताए ।

जिल्ला प्रहरी कार्यालयमा शनिबार दशैँको अवसरमा ठूलो भोजको आयोजना प्रती लक्षित गर्दै साहले जिल्लाभरबाट सयौँको संख्यामा अतिथी बोलाइएको र मेयर सम्मानले भन्दा पनि उनीहरुबाट प्राप्त चन्दाको आधारमा आतिथ्यता प्रदान गरिएको स्पष्ट पारे ।

दशैं खर्चको नाममा खुलेआम चन्दा उठाउने काम प्रहरीले नै गरिरहेको स्थानीय जनप्रतिनिधि तथा व्यापारीको गुनासो बढेपछी आफ्नो ध्यानाकर्षण भएको बताए ।

साहले प्रहरी प्रशासनले आफ्नो काम सुरक्षा प्रदान गर्नुको साटो जनता लुट्ने काममा लागेपछि प्रहरी प्रसाशनको आलोचना भइरहेको जिकिर गरे । उनले यसप्रति प्रशासनसँगै सरकार पनि गम्भीर हुनुपर्ने धारणा राखे ।