आज जनकपुरको राजदेवीमा 'भव्य श्रृंगार' र 'खोईच भराई'

न्यूज ब्यूरो, जनकपुरधाम । आज दशैंको सातौ दिन देशभरी पूजाआजा गरेर धार्मिक विधिपूर्वक फूलपाती भित्र्याउनुका साथै जनकपुरको राजदेवीमा भव्य श्रृंगार कार्यक्रम हुँदैछ ।

राजा जनककी कूलदेवी मानिएको शक्तिपीठ राजदेवीमा आज बेलुका भव्य श्रृंगारको आयोजना गरिएको आयोजक महावीर युवा कमिटिका अध्यक्ष सँतोष कुमार साहले जानकारी दिए । नवरात्रिको सातौं दिनलाई फूलपाती, आठौं दिनलाई महाअष्टमी, नवौं दिनलाई महानवमी एवं दशौं दिनलाई विजया दशमी भनिन्छ र यी दिनहरूको महत्व अधिक रहेको पाइन्छ। श्रृंगार साँझ ७ बजे हुने जनाइएको छ ।

आज बेलतोरी कार्यक्रम सहित माता राजदेवीमा भव्य श्रृंगारको आयोजना गरिएको हो । आज रातीदेखि प्रसाद चढाउने कार्यक्रम समेत सुरु हुनेछ भने बोकाबलीको लागि भोली अष्टिमी तिथि प्रत्येक वर्ष झैं तय गरिएको हो । घटस्थापनादेखि पूजाआजा गरिएको दशैंघर अथवा पूजाकोठामा शुभ साइतको प्रतीकका रुपमा उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र अन्य नयाँ पालुवा समेत भित्र्याउने गरिन्छ ।

भव्य श्रृंगारमा माता राजदेवीमा वृहत रुपले सरसफाई गरी श्रृंगार गर्ने कार्यक्रम हुन्छ भने महिलाहरु भव्य रुपमा आरती गर्ने गरिन्छ । आज राती १२ बजेदेखि नै खोईच भराई कार्यक्रम समेत विधिवत रुपमा सुरु हुने अध्यक्ष साहले जनाए । उनका अनुसार खोईच भराई कार्यक्रम अहिले पनि जारी छ । राजा जनककी कुल देवी मानिएको माता राजदेवीमा हजारौं श्रद्धालुगण सप्तमी तिथिका दिन खोईच भराई कार्यक्रम गर्ने गरिन्छ । मन्दिर प्रवेशमा महिलालाई रोक लगाएपछि मन्दिरको पश्मिचपट्टि रहेको टहरामा प्रत्येक वर्ष खोईच भराई कार्यक्रम हुँदै आएको छ ।

सन्तानको दीर्घायू, सन्तानको चाहना र परिवारको दीर्घायू सहित भाकल गरेकी श्रद्धालु महिलाहरुले माता राजदेवीमा खोईच भर्ने गरिन्छ । यसैबीच, माता राजदेवीमा आजै रातीदेखि नै प्रसाद चढाई कार्यक्रम समेत सुरु हुने आयोजकले जनाएको छ । प्रसादको लागि ११ बजेदेखि पँगति सुरु भईसक्ने जनाउँदे १२ बजेदेखि प्रसाद चढाई कार्यक्रम सुरु हुने समेत जनाइएको छ ।

महाविर युवा कमिटिले श्रद्धालुहरुको सुरक्षालाई मध्यनजर गर्दै स्वयँसेवक परिचालन गरेको छ भने नेपाल प्रहरीले समेत सुरक्षा दिएका छन् । पँगतिमा कुनै प्रकारको उच्छृङगल गतिविधि नहोस भन्ने उदेश्यले सादा पोशाकमा समेत प्रहरी परिचालन गरिएको हो । यस्तै, राजदेवीमा प्रत्येक वर्ष चढाउँदै आएको बोका बली भने भोली अष्टमी तिथि आईतबार साँझ ६:३० बजेदेखि सुरु हुने जनाइएको छ । विभिन्न संघ सँस्थाहरुले बोकाबलीलाई विरोध गर्दै आएको छ