जनकपुरमा यसपाली हनुमानले 'लंका दहन' गर्ने  !

न्यूज ब्यूरो, जनकपुरधाम । प्रत्येक वर्ष विजयादशमीको दिन रावण बध कार्यक्रम गर्दै आएको जनकपुरमा यसपाली लंकादहन कार्यक्रम पनि गरिने भएको छ ।

स्थानीय महाबीर युवा कमिटिको आयोजनमा प्रत्येक वर्ष विजयादशमीको दिन जनकपुरको धनुषसागर पोखरीमा गर्दै आएको रावण बध कार्यक्रम बेग्लै तरिकाले गर्न लागिएको महावीर युवा कमिटिका अध्यक्ष सँतोष साहले जानकारी दिए । साहका अनुसार, यसपाली विजयादशमीमा नयाँ कार्यक्रमको थालनी गरिएको छ ।

धनुषसागर पोखरी र गँगासागर पोखरीको बीच डिलमा प्रत्येक वर्ष विजयादशमीको दिन बेलुका रावण बध कार्यक्रमको आयोजना गरिदै आएको छ । जनकपुर क्षेत्रका एक विशिष्ट व्यक्तिको प्रमुख आतिथ्यमा उक्त कार्यक्रम गरिदै आएकोमा यसपाली त्यही कार्यक्रमलाई निरन्तरता दिँदै फरक पारिएको छ । असत्य उपर सत्यको विजयी भएको दिनलाई स्मरण सहित विजयादशमी मनाउने गरिन्छ ।

अध्यक्ष साहका अनुसार, धनुष सागर पोखरीको बीचमा तटस्थ रुपले काल्पनिक लँकाको निर्माण गरिने छ । बीच पोखरीमा काल्पनीक लँका निर्माण गर्नको लागि करिब ४ लाख रुपैयाँ खर्च हुने अनुमान गरिएको छ । डुङगा (नाउ) उपर विभिन्न प्रकारले घर निर्माण गरी लँका नामाकरण गरिनेछ । असोज २१ गते मँगलबारका दिन बेलुका लंका दहन कार्यक्रम तय गरिएको हो ।

निर्माण गरिने काल्पनिक लँका जलाउनको लागि र रावण बधको लागि अर्को डुङगामा रामभक्त हनुमान गएर आगो लगाउने कार्यक्रम रहेको छ । त्रेत्रा युगमा सीता हरणपछि खोज्दै लंका गएका हनुमानजीले लँका दहन गरेका थिए । सोही घटनालाई कल्पना गरी काल्पनिक लंकामा काल्पनिक (मानव निर्मित) हनुमानले आगो लगाउने दृश्य निर्माण गरिने जनाइएको छ ।

काल्पनीक लँका दहन दृश्य निर्माणको लागि अहिलेदेखि नै तयारी थालिएको अध्यक्ष साहले जानकारी दिए । उनले अन्य वर्षभन्दा यसपाली फरक तरिका र फरक दृश्य निर्माण गरिनेछ । रावण बधमा हजारौंको सँख्यामा आम सर्वसाधारण ओर्लिने गरेकोमा लँका दहन कार्यक्रमले झन सर्वसाधारणको सँख्या बढने दाबी उनले गरे ।