४ दिनदेखि कमला नदीमा बालक खोज्दै प्रहरी, अझै बेपत्ता  !

न्यूज ब्यूरो, सिरहा । गत असोज ७ गतेदेखि नै हराईरहेका सिरहाका एक बालकलाई प्रहरी दिनरात गरी खोजविन जारी राखेको छ ।

सिरहाको सिरहा नगरपालिका वडा न.. ८ महिसौथा टोलमा रहेको पोखरीमा नुहाउन गएका स्थानीय एक बालक हराएपछि डुबेको आशंका गरिएको छ भने उनको खोजविन तीव्र पारिएको छ । स्थानीय नागेन्द्र मरिकको १३ बर्षिय छोरा टुकराज मरिक गत असोज ७ गते नै साथीहरुसँग नुहाउन गएपछि पुनः घर फिर्ता नभएपछि खोजविनको लागि प्रहरीसँग आग्रह गरिएको हो । उनका साथीहरु आएपनि टुकराज नआएपछि डुबेको हुन सक्ने आशंका गरिएको छ ।

महिसौथामा रहेको उक्त पोखरी धनुषा र सिरहा जोडने कमला नदि छेउमै रहेकोले कमला नदीमा पनि विगत ३ दिनदेखि खोजी प्रयास जारी राखिएपनि अझ बेपत्ता नै छन् । प्रहरीले निरन्तर रुपमा खोजविनको लागि डुंगा चलाएका छन् तर अझ टुकराज भेटाउन सकेको छैनन् । न्यूज ब्यूरोसँग कुराकानी गदै सिरहाका प्रहरी प्रवक्ता डिएसपी अपिलराज बोहराले कमला नदी र महिसौथाको त्यो पोखरीसँग डाईभर्सन भएकोले कमलामा पनि खोजविन तीव्र पारिएको जनाए ।

टुकराज विगत ४ दिनदेखि बेपत्ता भएपछि सिँगो टोलमै रुवावासी भएको छ भने उनका परिवारजन र आफन्तमा शोक छाएको छ । अझै पनि टुकराज भेटाउने आसा भने उनको परिवारमा पलाएको देखिएको छ । उनको खोजविन जारी राखिएको प्रहरीले जनाएको छ । सशस्त्र प्रहरीको गोताखोर टोलीले खोजी कार्य जारी राखेको छ ।