जीतिया पर्वमा कमला नुहाउन आएकी बालिका डुबिन, आमा बेहोस !

न्यूज ब्यूरो, जनकपुरधाम । तराई मधेशमा मनाइने जीतिया पर्वमा कमला नदिमा स्नान गर्न आएकी बालिकाको डुबेर मृत्यू भएको छ ।

जिल्ला प्रहरी कार्यालय धनुषाले दिएको जानकारी अनुसार मृतक बालिका सिरहा जिल्लाको मिर्चैया नगरपालिका वडा नं. ६ मिर्चैया बस्ने स्थानीय सँजीव साहकी अन्दाजी बर्ष ९ की प्रकृति साह रहेकी छन् । जीतिया पर्वलाई मध्यनजर गर्दै कमला स्नान गर्न अभिभावकसँगै आएकी प्रकृति शनिबार दिउँसो करिब १२ बजे धनुषाको पोर्ताहा र सिरहाको बन्दीपुरको बीचमा कमला नदीमा डुबेर मृत्यू भएको हो ।

कमला नदीमा डुबेर बेहोस भएकी प्रकृतिलाई आमाले देखेपछि तत्कालै आमा पनि बेहोस भइन । जिल्ला प्रहरी कार्यालय धनुषाका प्रहरी प्रवक्ता डिएसपी रामेश्वर कार्कीका अनुसार मिर्चैयाबाट कमलामा नुहाउन आएकी आमाछोरी सँगै नुहाएकी र छोरी प्रकृतिलाई उनकी आमाले पहिले नुहाईधुवाई गरी किनारा लगाएकी थिइन । प्रकृतिलाई किनारा लगाएर आफू नुहाउन थालेपछि कति बेला प्रकृति पानीमा फेरी नुहाउन गइन थाहै भएन, केही बेरपछि प्रकृति डुबेको देखेपछि उनकी आमा बेहोस भइन, होसमा आएपछि स्थानीयसँग गुहार लगाउँदै उनकी आमाले स्थानीयकै सहयोगमा धनुषाको गोदार स्थित रहेको समर हेल्थ केयरमा उपचारको लागि लगिएको र केहीबेरपछि अस्पतालले मृत घोषित गरेको बताए ।

घटना दिउँसो १२ बजे नै भएपनि प्रहरीलाई भने अपरान्ह ४ मात्र जानकारी गराएको प्रवक्ता कार्कीले बताए । मृतक प्रकृतिको शवलाई पोष्टमार्टमको लागि सिरहा अस्पताल लगिएको जनाइएको छ भने उनको आमाको अवस्था भने जटिल बन्दै गएको बुझिएको छ ।