निजगढ अन्तराष्ट्रिय विमानस्थल ५ वर्षभित्रै तयार हुन्छ : मन्त्री भट्टराई

न्यूज ब्यूरो, काठमाडौं । नेपाल सरकारको संस्कृति, पर्यटन तथा नागरिक उड्डयन मन्त्री योगेश भट्टराईले अबको ५ वर्षभित्र कुनैपनि हालतमा निजगढ अन्तराष्ट्रिय विमानस्थल तयार हुने बताएका छन् ।

काठमाडौंमा जारी नेपाल पूर्वाधार सम्मेलनमा मन्त्री भट्टराईले विमानस्थल निर्माणका लागि ठोस रुपमा प्रक्रिया अघि बढिसकेको जानकारी दिँदै ५ वर्षभित्रै विमानस्थल तयार हुने बताएका हुन् । उनले निकट भविष्यमै दुई ओटा अन्तराष्ट्रिय विमानस्थल सञ्चालनमा आउन लागेको पनि जानकारी दिए ।

मन्त्री भट्टराईले वैदेशिक लगानीका लागि नेपाल अहिले सबैभन्दा राम्रो र उपयुक्त गन्तव्य भएकोसमेत बताए । नेपालका सबै राजनीतिक दलहरु विकासको मुद्दामा एकै ठाउँमा उभिएकाले लगानीको वातावरणमा कुनै समस्या नभएको उनले बताए ।

नेपालमा हवाई यात्रुहरुको संख्या उल्लेख्य मात्रामा वृद्धि भइरहेको भन्दै यसप्रति गम्भीरता पूर्वक अघि बढेको उनको भनाई थियो ।